E proyekto aki ku Fundashon Formashon i Alegria a presentá na Gobièrnu, tin komo meta prinsipal pa brinda alumnonan di Enseñansa Speshal di Kòrsou formashon kultural edukativo, sosial, spiritual, emoshonal i físiko na un forma responsabel. Den e formashon aki lo tene kuenta ku e hóben su nesesidat di desaroyo, di moda ku e por funshoná mihó den komunidat, resistí mal influensha i presta mihó na skol. Aktividatnan konkreto ku e hóben ta haña oportunidat pa desaroyá su talentonan ta entre otro guia pa traha hùiswèrk, formashon físiko, weganan i otro aktividatnan di rekreashon. Di e forma aki ta hasi esfuersonan pa brinda e hóbennan mihó resultado di skol i alabes pa duna un sosten na mayornan pa oumentá nan kapasidat pa yuda nan yunan den e proseso total di formashon integral.
Pa por alkansá e meta aki ta desaroyá, ehekutá, evaluá i ahustá aktividatnan hustamente pa e grupo di hóbennan speshal aki. Alabes ta promové un klima di trabou, enseñansa i rekreo salú dor di tur otro medio ku por yuda realisá e meta pa ku e grupo di hóbennan aki.E aktividatnan despues di skol pa formashon di nos hóbennan speshal ta konsentrá riba 4 skol di Enseñansa Speshal ku ta Vista del Mar School (Z.M.L.K.), Van Houte School (Z.M.L.K.), Alablancaschool (M.L.K. i Z.M.L.K.) i Marieta Albertoschool (M.L.K. i Z.M.L.K.)
Riba e potrèt por mira diputadonan sra. Marilyn Alcalá-Wallé i sr. Humphrey Davelaar huntu ku sr. Reginald Doran (USONA), Sr. Rob Vermaas (VNW) i Sra. Amintha Sprockel i Sr. Clifford Goilo di Fundashon Formashon i Alegria.