Sosteniendo un inisiativa noble ku a sali for di Stichting Overheidsaccountantsbureau, SOAB i ku aprobashon di Gobièrnu di Kòrsou, pronto, bou di kordinashon di Diputado pa asuntunan General Sra. Zita Jesus Leito, lo kuminsá ku kolekta bou di tur empleado ku ta traha pa Gobièrnu di Kòrsou, esnan di Gobièrnu Sentral i tambe bou di tur empleado ku ta traha na e N.V.nan i fundashonnan di e respektivo Gobièrnunan.

 

Dicho petishon a bai pa Gobièrnu sentral tambe i a keda aprobá pa Sra. Emily de Jongh Elhage, Promé Minister di Antillas Hulandes.  

 

E kolekta lo tuma lugá di e forma aki: SOAB lo habri un kuenta na un banko lokal, lo pidi koperashon di tur hefe di Servisio, Direktor òf su suplente, pa risibí e donashon di e empleado públiko i na nan turno entrega esaki na S.O.A.B. ku lo deposit’é riba e kuenta ku a keda habri. Òf tur hefe di Servisio, Direktor òf su suplente lo por deposita e montante total, riba e kuenta ku a keda habri. E kuenta lo keda manehá pa SOAB.

 

Kada hefe di servisio òf su suplente lo por registrá e donashon na nòmber pa asina e tuma lugá ku tur transparensha posibel.

 

E idea ta pa kada empleado depositá e montante di  Fl. 10,-- mínimo, pero no ta obligatorio, kada empleado lo por duna loke e ke.

 

Ku e fondonan kolekta e dòkternan di Kòrsou ku lo bai Haiti pa yuda, lo kumpra remedi i loke ta urgente i manda esaki pa Haiti, di e forma aki lo kordiná mihó kon e fondo lo keda uza.

Pa risibí un sosten amplio di tur empleado públiko, lo manda un

e-mail di partisipashon na kada Empleado ku ta disponé di un kòmpiuter i na su turno e lo por kompartí esaki ku su koleganan ku no ta disponé di e medio elektróniko aki.

 

Diputado Sra. Zita Jesus Leito ta súplika tur empleado públiko di Gobièrnu di Kòrsou i demas koleganan di e otro instanshanan, pa ban saka kara pa un kousa noble.

 
 

Un súplika ta bai na tur empleado públiko di e respektivo Gobièrnunan pa konsiderá e anunsio aki komo unu personal.