24ora.an - E Prome den Notisia - Hopi interes di schoolnan pa proyecto Teen Keep it Clean

Via di e proyekto “Teen Keep it Clean” ke stimulá nos hóbennan pa nan bai pensa riba un forma mas kreativo riba nan komportashon di riesgo, manera humamentu, konsumo di alkohòl i droga, ku por tin konsekuensha riba nan salú, ku despues di tempu por duna nan kanser. Ta un proyekto ku lo keda ehekutá huntu ku skolnan, di moda ku un grupo mas grandi posibel di hóben por partisipá na esaki i duna un resultado mas positivo. E proyekto ta finalisá ku un simposio ku lo keda tené dia 17 di yüni 2009. E intenshon ta pa kada skol forma diferente grupo di hóben, ku ta bin huntu i diskutí den grupo kon nan komo hóben, ta pensa kon por kambia e komportashon di riesgo serka nos otro hóbennan pa lokual ta prevenshon di humamentu, uzo di alkohòl i droga. Nan mester visualisá nan mensahe i presentá esaki den forma di un poster, jingle òf spòt pa televishon. E materialnan aki mester keda entregá promé ku djabièrnè 22 di mei 2009 serka señora Sharine Bouthisma di Prinses Wilhelmina Fonds. Tur poster, jingle i spòt di televishon lo keda evaluá dor di un hurado profeshonal, ku lo skohe e 3 mihó obranan den kada kategoria. E posternan lo keda eksponé for di 31 di mei te ku 7 di yüni 2009 den Biblioteka Públiko Kòrsou. Dia 17 di yüni durante un simposio ku lo keda tené den kuadro di “Dia Internashonal di Prevenshon di Humamentu” lo saka i presentá e ganadónan di kada kategoria. E ganadónan lo risibí un premio di Prinses Wilhelmina Fonds. Ta e intenshon tambe pa uza e obranan aki komo material edukativo pa konsientisá otro hóbennan ku n’e. Lo traha un poster ofishal i repartí esaki na tur skol i otro lokalidatnan ku nos hóbennan ta frekuentá. Meskos lo traha un jingle ofishal di e material ganadó i pasa esaki na radio, meskos tambe ku e spòt di televishon. Banda ku lo uza e materialnan aki komo material edukativo, e skolnan ganadó lo risibí un premio dor di e organisadónan. Mester bisa ku e interes serka e skolnan ta grandi. Ya kaba tin diferente skol manera Radulphus College, Scholengemeenschap Parera, Scholengemeenschap Otrabanda (Jacques Ferrandi), Mgr. Zwijsen College, Regina Pacis VSBO Bovenbouw, Triniteit College, SKIA VSBO, Maris Stella VSBO, Peter Stuyvesant, Maria Immaculata Lyceum (MIL), St. Martinus VSBO, Regina Pacis Onderbouw i otronan inskribí pa partisipá. Durante un enkuentro ku Radulphus College, komishon “Teen Keep it Clean” a keda hopi impreshoná ku e kreatividat ku e alumnonan a demostrá. Nan por a mira un presentashon di e diferente obranan ku e alumnonan a prepará. Si tin skolnan ku ainda ke partisipá na e proyekto aki, nan por tuma Kontakto ku señora Sharine Bouthisma di Prinses Wilhelmina Fonds na telefòn 461-1998 òf 666-2323 òf via email This e-mail address is being protected from spam bots, you need JavaScript enabled to view it