| Rector ta nombra dekano na SEF i AF |
|
|
|
| Friday, 05 November 2010 - 11:55 | |
Awe mainta Rector
Magnificus Dr. Miguel Goede di universidat di Kòrsou UNA pa boka a anunsiá su
desishon pa loke ta nombramentu di dekano na dos di e sinku fakultatnan. Anke ku e no ta respaldá e konsiderashonnan di e Komishon di Hòmber Sabí
riba tur punto, finalmente el a disidí tòg pa nombra e dos kandidatonan ku a
haña preferensia di e komishon.Klik read more pa mas informashon...
E komishon a preferá di nombra un kandidato
interno na e puesto, miéntras ku e Rector tabata ke kandidato di afó pa por
realisá un intervenshon den e kultura stanká i asina logra implementá e
kambionan nesesario. Esaki ta nesesario pa por skohe un rumbo nobo i mas
moderno pa UNA, pero tambe pa por mehorá e organisashon interno. Resientemente
e komishon aki, konsistiendo di señornan Rafael Pichardo, Angel Bermudez i Anthon Casperson, a
finalisá su relato. Dr. Goede a gradisí e komishon pa nan trabou.
Pa e fakultat sosioekonómiko (SEF) ta nombra señor Dr. Francis de Lanoy komo dekano pa un aña. Dr. Goede mes a pensa di nombra komo su kandidato señora Stella van Rijn MBA komo dekano na SEF, pero e persona aki mientrastantu no ta disponibel mas pa e posishon pisá aki. Na e fakultat general (AF) a disidí pa ekstendé e término di señora Dr. Liesbeth Echteld. Originalmente e Rector tabata ke nombra señora Drs. Jeanine Cozijns-Isenia komo dekano na e fakultat aki. Mientrastantu e kandidato aki tampoko no ta disponibel mas pa e puesto aki. Konforme e konseho di e komishon, tur dos dekano ta haña un seri di meta kuantifikabel ku nan mester alkansá den e periodo ku ta resta nan den e puesto di dekano i a base di kua por husga nan funshonamentu periódikamente. En todo kaso un di e tareanan prinsipal i mas urgente ta pa un finalisashon próspero di e proseso andando di akreditashon. Pa un splikashon mas amplio i por eskrito di su desishon i di su puntonan di krítika riba e konseho di e Komishon di Hòmber Sabí lo mester warda te despues ku e Rector ta bèk na Kòrsou, pasobra den fin di siman e ta sali pa un biahe di trabou di un siman na Guadeloupe. |
