E selebrashon lo tuma lugá den kurason di banda’riba, dilanti Kooyman i winkelcentrum Paseata te na Sta Rosa Liqueur Store.

 

Ban Topa Banda’Riba

Introdukshon

Fundashon Plataforma Banda’Riba ta un grupo di boluntario ku ta organisá aktividatnan sosial kultural pa tur bario parti pariba di Kòrsou.

E fundashon aki ku ta konsistí di habitante nan di pariba ta bolbe uni forsa pa selebrá riba

7 novèmber próksimo e “Dia di Banda’Riba”.

 

Meta di e dia aki  ta:

Selebrá un aktividat sentral kaminda habitantenan di pariba en partikular i Kòrsou en general por bini huntu pa selebrá Dia di Banda’Riba ku énfasis riba alsamentu di konsenshi sosial kultural di e region ost di Kòrsou.

 

Grupo di enfoke:

Habitante nan di bario nan:

Bonam – Vetter – Kirindongo Abou – Oost Jongbloed – Ronde Klip – Zapateer – Ma Louisa -Tocacas – Juan Louis – Koraal Partier – Sta Catharina – Seru Pretu – Libie – Kwartje - Herts – Sta Rosa – Barbouquet – Las Almas – Skèrpènè – Montaña – Montaña di Rey - Montaña Abou – Seru Molina – Roi Santu – Hanenberg – Semikok – Toni Kunchi - Hoenderberg – Cas Grandi – Jan Thiel – Brakapoti – Jan Sofat – Weto – Jan Boos – St Joris - Choloma – Sabana Crasz – Sabana Baka – Seru Grandi – Seru Grandi – Seru Milon – Seru Loraweg – Katoentuin – Oude Water – Rekompensa – Cas Cora – Oost i Noord Sta Rosa - Abrahamsz – Popo – Koraal Specht – Janwe – Dominguito.

E dia lo inisiá ku karedanan  di 2, 5 i 10 km  i tambe 100 i 200 m pa nos hobennan den kaya nan di banda’riba kuminsando 6’or di mainta saliendo for di Paseata  i lo terminá dilanti di Paseata riba Sta Rosaweg.

Lo sigui ku un santu sakrifisio di misa na misa di Sta Rosa pa 9’or di mainta.

Rekonosimentu lo wòrdu duna na baluartenan di banda’riba i lo entrega “Wil di Perseveransia” na hóben nan ku ta destakando.

Banda di tur esaki nan lo tin wega nan manera Bon Kuné, Dominó i skina pa mucha i pa nos grandinan.

Animashon musikal lo ta na enkargo di  kaha di òrgel,  bandanan lokal i  DJ. Lo tin tambe un Gruponan  folklóriko, gruponan di tambú i  hopi kos mas pa tene tur habitantenan kontentu.

Lo tin hopi stent di kuminda, kos dushi i obra di man.

Pa hürmentu di stent por tuma kontakto ku sra. Nathaly Gerard na tel: 767-1531i 522-5333  òf Maida Bentoera na 563-0268 of  por pasa personal na Barbouquet # 6. Último dia pa inskribí lo ta diadumingo 24 oktober 2010. Despues di e fecha  esaki lo no tuma ningun stent korda ku karchi di kur mester ta na ordu.

Entrada lo ta kompletamente grátis

Dia: 7 novèmber 2010 (ta e gran dia)

Orario: 7:00 am – 10:00 pm

Comments (0) >>