| Gezaghebber Interino ta hasi apelashon na komunidat pa keda alerta i skucha notisianan di wer |
|
|
|
| Wednesday, 08 September 2010 - 23:44 | |
|
Despues di un temporada hopi kayente, seku i ku masha poko
yobida Kòrsou a ser sorprendé awe mainta ku áwaseru fuerte, bos, werlek i na
algun área molèster relashoná ku un warwarú ku a pasa riba parti di nos isla. Klik read more pa mas informashon...
E
situashon aki tabata motibu pa Gezaghebber interino señor Kenneth Gijsbertha
yama un reunion ku algun instansha ku tin representashon den Ofisina pa
Kalamidat (Rampenburo) pa evaluá e susesonan di awe mainta, hasi un
inventarisashon di daño preliminar, deliniá akshonnan i kaminda ta posibel tuma medidanan di
prevenshon.
Mester bisa ku despues di mèrdia e situashon a normalisá bastante. No opstante esaki Gezaghebber ta urgí komunidat pa keda alerta i skucha notisianan di wer di Servisio Meteorológiko. Relashoná ku e mal tempu i hopi áwaseru ku tin riba Venezuela e situashon por bolbe kambia den oranan di awe nochi lat i tambe durante mardugá pa mañan mainta na Kòrsou. Durante e enkuentro presidí pa Gezaghebber internino tabat’ei presente entre otro representantenan di ofisina di Gezaghebber, Servisio pa Komunikashon i Informashon i e instanshanan DOW, Servisio Meteorológiko, Kuerpo Polisial i Brantwer ku a duna un relato di e situashon okashoná pa e warwarú, áwaseru i akshonnan ku a tuma pa solushoná i aliviá e situashon ku a presentá. Na su turno señor Martis di Meteo a splika ku pa un warwarú presentá mester tin por lo ménos tres kondishon, suela ku ta kayente, instabilidat den aire i bientu suak. Si e tres kondishonnan aki ta presente por okashoná formashon di un warwarú. Pa loke ta e kantidat di awa ku a kai rònt Kòrsou Meteo a midi 22 mm na Aeropuerto i 66 mm na entre otro Groot Davelaar.
E warwarú a pasa den area entre Gato i Tera Cora. Den bario di Brantwer a aliviá e situashon presentá dor di fasilitá tapòl pa e kasnan konserní ku a risibí daño na nan dak. Kuerpo Polisial tambe a risibí diferente notifikashon di molèster okashoná pa e warwarú, áwaseru i welek. Pa loke ta áwaseru 4 skol i un krèsh i diferente kas tabatin hopi molèster di awa ku ta subi i drenta paden i palu ku a kai na altura di van Krimpenlaan i un muraya di betòn ku a basha abou na Perseusweg. Werlek tambe a alkansá un palu di telefòn i un kas. DOW ta kontinuá ku su tarea di limpia e roinan i tera ku a subi kaminda di moda ku e awa por fluktua normal bai su destino prinsipalmente den Punda, Otrobanda, Nieuwe Haven i Saliña. Gezaghebber ta urgí un biaha mas pa un i tur tuma nota di e atvertenshanan ku Meteo ta pasa via medionan di komunikashon. Tambe ta importante pa sigui instrukshonnan debidamente, evitá kosnan lòs den kurá, kontrolá bentana, porta i dak i kita tur kos den kurá ku por wanta awa pa evitá molèster di sangura. Pa outomobilistanan un biaha mas ta bai e atvertensha pa tene kuenta ku ora awa kai e situashon den tráfiko por bira mas peligroso, kaya ta slep mas fásil, lusnan di tráfiko por kai afó i e konsekuenshanan di kore duru por ta fatal. Tene pasenshi i kumpli ku leinan di tráfiko pa evitá aksidente. |
