Despues ku Rector Magnificus dr. Miguel Goede a habri e enkuentro den oula, profesor Joop Halman a duna un splikashon di e di ophetivo i aktividatnan di Stichting ABC Advies. Seguidamente e presidente di e hurado profesor Boorsma a para ketu en ekstenso na e rasonnan pa kua e miembronan a selektá Guido Rojer, Bryan Jansen i Els Langenfeld komo e nominadonan. Dos di e tres nominadonan, esta Bryan Jansen i Els Langenfeld, a duna e públiko un splikashon di nan tésis promé ku a anunsiá e ganador.

Di tres premio

Ayera nochi Guido Rojer, e di tres nominado i alabes ganador di e di tres premio, no tabata presente e anochi ya ku aktualmente e ta bibá na Hulanda kaminda el a sigui studia. Pa su tésis ‘The Next Market’, ku kua el a finalisá su estudio di ‘Business Administration’ na e Fakultat Sosial Ekonómiko na UNA, el a investigá si ta posibel pa eksportá e awa produsí na Kòrsou. El a skohe Florida komo posibel área pa eksportashon. Den su tésis e ta deskribí e diferente tiponan di awa na bòter, e merkado i e kompetensia den e parti sur di Florida i ademas e strategianan pa por penetrá den e merkado aki komo produktor chikitu di afó. E hurado a haña esaki un tópiko interesante ku un mensahe práktiko i sosialmente relevante.

Di dos premio

E tópiko di e tésis di Bryan Jansen di e Fakultat Tékniko ta trata e diseño di un prototipo di un mashin ku ta usa awa di laba kos dinobo. Bryan Jansen a diseñá un mashin i a konstruí un prototipo ku ta filtra e awa pa hawa kos den un mashin di laba kos ful outomátiko i ku por warda esaki pa usa despues pa un otro siklo di laba kos. El a logra diseñá un aparato ku ta di interes sosial, ku kua por redusí tantu uzo di energia, uzo di awa komo polushon di medio ambiente. E hurado a haña esaki un tésis di nivel haltu den kua Bryan Jansen a logra apliká diferente disiplina tékniko den su estudio. Bryan Jansen a haña e di dos premio pa su tésis.

E promé premio

Els Langenfeld a mira kon nan a koroná su tésis ‘Un futuro nobo pa Wechi’ ku e prestigioso promé premio i un suma di plaka di 1500 euro destiná pa un biahe di estudio dentro di Reino. Landhuis Wechi ta e lanthùis na plantashi Malpais. Den su tésis multi-fasétiko e ta deskribí e problemátiko general di restorashon di Landhuis Wechi, di e materialnan di konstrukshon ku a usa den kurso di historia i di e solushonnan arkitektóniko. El a bai mas detayá den historia di e lanthùis mes, for di tempu di West-Indische Compagnie. Awor e lanthùis tin e status di monumento i e ta propiedat di Fundashon Kas Popular. El a dokumentá e lanthùis, probablemente esun mas chikí di Kòrsou, ku tur e edifisionan anekso den pintura i potrèt. Ademas señora Langenfeld a traha plan i skèts kon lo mester kontinuá ku e lanthùis i e besindario kaminda e ta situá. Na opinion di e hurado ta trata di un dokumento polifasétiko kaminda a profundisá tantu den aspektonan di konstrukshon komo debidamente tambe den su historia. El a bira un tésis ku un relevansia sosial haltu. Els Langenfeld a kaba su estudio na e sekshon di Bouwkunde di UNA su Fakultat Tékniko.

Ta remarkabel ku e Fakultat Tékniko ku dos tésis a bira e gran ganador. Esaki ta ilustrá ku e fakultat aki, ku nan lo akreditá pronto, ta funshoná riba nivel haltu.