Ayera Promé Minister Balkenende di Hulanda a ofresé un almuerso na e diferente lider di delegashon di e islanan, Aruba i Antia Hulandes. A repasá tur loke ta programá pa tuma lugá entre 6 i 9 di sèptèmber.

Na e okashon aki Diputado di Struktura Estatal Sheldry Osepa a splika ku Konseho Insular a aprobá e areglo di estado djasabra 4 di Sèptèmber, ku un mayoria di voto. Tambe a splika na presentenan   ku e delegashon di Kòrsou a haña  instrukshon di Konseho Insular  pa regla un prosedura, ku por sigui pa inkluí den e leinan di konsenso  un klóusula di terminashon. Diputado Osepa a afirmá ku e Gobièrnu di Kòrsou aktual lo no para e proseso pa realisá Pais Kòrsou na 10 di Òktober 2010.

Un reunion di importansia ku a kuminsá awe ta e “Politieke Stuurgroep” di kambionan estatal. E reunion aki ku ta konsistí di tur miembro di e delegashonnan ku ta na Hulanda, a kuminsá 13:30 ora di Hulanda.  E promé punto ku a trata ta stipulashon di e ”Geannoteerde Agènda”. Manera ta konosí e agènda pa e tipo di reunionnan aki tin e puntonan pa diskutí pero simultáneamente ta kontené anotashon di  puntonan ku konkretamente delegadonan mester tuma un desishon riba dje. 

A repasá tur e puntonan globalmente na kuminsamentu di e reunion i a tuma nota ku algun di nan mester keda diskutí den/o ku otro delegashonnan.

A skors e reunion aki pa duna tempu na e delegashonnan pa diskutí, i tambe  pa Sekretario di Estado Sra. Bijleveld atendé un reunion na  2de Kamer.

Lo kontinuá ku e reunion di “Politieke Stuurgroep” estatal mas aweró.

Mas den ora anochi tin planeá e debate den Tweede kamer kaminda lo a keda di atendé e areglonan di estado di e islanan. Mayan lo vota riba e areglonan aki.