Ya ku den kasi un aña i mei tras di lomba Freewinds sporádikamente a mara na Kòrsou, e tradishon di hopi aña di konsierto mensual na bordo a kai na awa. Djarason awor ta restablesé e tradishon bunita aki ku un konsierto na bordo kaminda e públiko general ta invitá. E anochi aki Freewinds Band, rekonosé den henter e área di Karibe, ta kompañá e kantante lokal Debby Beaujon den un variedat amplio di estilo musikal, entre nan jazz. P’esei no ta un sorpresa tampoko ku a pidi asistensia tambe di e basista lokal Hershel Rosario.

Karchi di entrada pa e konsierto aki na un di e wafnan na Otrobanda – den mayoria kaso nan ta mara na Mathey, esun mas serka di e sitio kaminda fèri ta mara – ta kosta 15 florin pa persona. Huntu ku Curaçao Jazz Foundation ta destiná parti di e fondonan rekoudá e anochi ei pa un instansia lokal ku ta hasi bon trabou den nos sosiedat.