E delegashon enkabesá pa Diputado di Struktura Estatal

Sheldry Osepa, ta konsistí tambe di Diputado Charles Cooper,  miembronan di Konseho Insular  Eugene Cleopa,  Dennis Jackson,  Humphrey Davelaar,  Zita Jesus-Leito i  Gerrit Schotte. Tambe Sekretario di Teritorio Insular di Kòrsou  Donald de Palm, miembronan di Plataforma di Konsulta, konseheronan hurídiko i finansiero ta forma parti di e delegashon.

E delegashon ku ta aktualmente na Hulanda tin instrukshon, fihá dor di Konseho Insular di Kòrsou pa loke ta trata e posishon di e gobièrnu nobo riba  tereno di struktura estatal. Konseho Insular a disidí ku Kòrsou lo partisipá na e konferensha di mesa rondó.

Tambe e instrukshon di Konseho Insular  na e delegashon ta enserá ku mester yega na palabrashon ku e otro partnernan den Reino pa despues di e kambio di Statüt, regla un prosedura pa  inkluí den e leinan di konsenso un areglo di terminashon konkreto di e leinan aki. Inkorporashon den kada lei di Konsenso, di un klóusula di terminashon, - opzegrecht-,  lo garantisá ku Kòrsou  lo haña su outonomia kompletu den Reino Hulandes.

Ademas instrukshon ta enserá un konfirmashon ku artíkulonan 58 te ku 60 di Statüt, lo por ta aplikabel pa Kòrsou tambe.

Vishon di e Gobièrnu nobo ta pa regla for di awor aki e oportunidat pa generashonnan nobo por disidí pa enkaminá e prosedura  pa yega na un pais soberano aki 10, 20 o 30 aña.  E opshon di  reglá  e posibilidat  aki no ta algu nobo, ya ku esaki ta regla kaba den Statüt, pero pa otro pais den Reino. E delegashon na Hulanda ke realisá esaki tambe pa Pais Kòrsou.

Entre mayan i djarason sobra miembronan di e delegashon di Kòrsou lo yega Hulanda. Djamars  i djarason lo kontinuá ku mas reunion di preparashon  ku lo kulminá ku e Konferensha di Mesa Rondó djaweps 9 di Sèptèmber 2010.