| Tur kos ta kla pa bishita di e tallship "ARC Gloria" di Colombia |
|
|
|
| Tuesday, 31 August 2010 - 22:51 | |
Despues di e
eksitoso bishita di e barku di training "Cuauhtémoc" di Mexico, den
fin di siman aki nos lo tin bishita di otro tallship, e biaha aki ta trata di
"ARC Gloria" di Colombia.
Segun e skema di biahe, "ARC Gloria" lo yega Kòrsou
djabièrnè 3 di sèptèmber ± 8'or di mainta i lo despedí di nos haf djaluna 6 di
sèptèmber atardi 4’or. "ARC Gloria" ta un velero ku ta midi 67 meter
di largu, 10.6 meter di hanchu i lo tin un kantidat di mas o ménos 150 persona
abordo, tantu ofishal, sup ofishal, kadete den training komo infante marino. Esaki
ta trata di e di 2 bishita di "ARC Gloria", ku den pasado, na aña
1999 a yega di bishita nos isla kaba pa selebrá ‘Korsou 500’ huntu ku nos.
"Nos ta hopi kontentu i
satisfecho ku e desaroyonan ku nos tabatin e aña aki", señora Lucky
Ezechiëls, presidente di Curaçao Sail Foundation a informá. "Durante e
nuebe lunanan di e aña aki, nos a logra di trese 4 tallship Kòrsou. Den luna di
mei tabata e barku "Eagle" di Merka i na yüli e barku di treinen
"Simón Bolívar" di Venezuela a bishita nos. Den luna di ougùstùs
tabata e barku Cuauhtémoc di Mexico, i awor den luna di sèptèmber ARC ‘Gloria’.
Pues nos ta mira ku nos esfuersonan ta dunando fruta i poko poko pero sigur nos
ta kumpliendo ku nos metanan".
Meskos ku semper ta e kaso, Curaçao
Sail Foundation a traha un programa hopi interesante pa e tripulantenan di e
barku. Entre otro lo tin e kustumbrá rekorido rònt di nos isla, bishita na un
museo, na nos lanthuisnan pero tambe lo duna nan posibilidat amplio pa hasi kompra den nos
komersio. Lo tin tambe bishitanan protokolar serka outoridatnan insular i (pa
ultimo biaha) estatal.
Riba djasabra 4 di sèptèmber pa 9'or
di mainta lo tin un ofrenda floral na estatua di Almirante Luis Brion na
Brionplein; tambe algun tripulante lo bai yuda ku labor komunitaria.
Curaçao Sail Foundation ta invitá
henter komunidat i prinsipalmente nos hubentut pa hasi uzo di e okashon aki pa
bai sera konosí ku e barku, ku a hasi tantu furor den ‘Korsou 500’. |
