Konforme artíkulo 10 di ‘Kiesreglement Eilandsraad Curacao’, tur hende ku ta deseá esei por haña un kopia kontra di pago di e asina yama kiezersregister. Den e kuadro aki tambe tur partido polítiko ku partisipá na e elekshon por haña disposishon di un kopia di e kiezersregister. Ta kustumber ku partidonan polítiko ta hasi uso di esaki na e urnanan pa kontrolá entre otro ta ken a bin vota si òf no.  Tur esaki den kuadro di e transparensha ku kiesreglement ta para pe.

Esaki no ta trese violashon di sekresia di voto kuné. E loke ku kada persona vota ta keda sekreto. Loke no ta sekreto ta ken ta partisipá na e votashon i ken si òf no a bai vota. Den e urnanan e presidente di urna i un di esnan enkargá ta bisa na bos haltu e nòmber i identifikashon di esun ku a bin vota, promé ku entreg’é su formulario pa vota.

Den e kuadro ariba menshoná, Konseho Supremo Elektoral a konfirmá ku un kandidato riba e lista di partido Niun Paso Atras ku no a haña voto durante e  elekshon di djabièrnè último, no a partisipá na votashon. E konfirmashon akí ta pa kita tur spekulashon i garantisá konfiabilidat i transparensia di e proseso i e aparato elektoral.