Servisio pa Komunikashon i Informashon ta notifiká ku e dia di elekshon pa Konseho Insular 2010 a habri sin problema signifikante. Klik read more pa mas informashon...

For di promé ku 6’or di mainta a kuminsá parti buzon i otro rekisitonan nesesario pa e presidentenan di e diferente urnanan. Bou di guia di polis i miembronan di VKC i SKS e presidentenan a bai nan lokalidat pa instalá e urna. Tabata tin un urna ku a habri mas lat ku e orario stipulá pa motibu di falta di material.

Riba nan ruta di kontrol e diferente miembronan di Konseho Supremo Elektoral no a ripara filanan largu di hende ku a bai vota. Te na e momentu aki 19.7% di totalidat di votadó a bai vota kaba.

En total tin un kantidat di 114.828 votadó for di kua 108.825 a risibi nan karchi di vota ku ta 95% di e kantidat di votadó. Kompará ku e último elekshon a entregá 1% mas tantu karchi di vota. Di esei 2.386 karchi a bin bek pa diferente motibu manera adrès ku no ta kuadra, falta di brievenbùs of kacho ku ta stroba entrega di karchi. Te ku awor 2.687 votadó a buska nan karchi na Kranshi.

Konseho Supremo Elektoral ta urgi tur hende ku no a bai vota ainda pa bai hasi uso di e derechi sagrado aki awe. Ta pidi tur doño di trabou pa kòrda duna nan personal oportunidat di bai vota durante 4 ora konsekutivo durante e oranan ku e urnanan ta keda habri. E oportunidat pa bai vota ta te ku 7’or awe nochi.