Servisio pa Komunikashon i Informashon ta partisipá ku djamars último 24 di ougùstùs Gobièrnu di Teritorio Insular di Kòrsou den persona di diputado di Enseñansa, Kultura i Deporte sra. Marilyn Alcala-Wallé a firma den kuadro di SEI un proyekto ku ta trata “Perspektiva pa Hóben i Adulto”. Klik read more pa mas informashon...

Meta di e proyekto aki ta pa ofresé hóbennan ku tin un nivel di formashon mas abou ku di dos klas di VSBO un trayekto di formashon pa nan por yega na trabou òf sigui enseñansa regular bèk. Tambe e proyekto ta sòru pa krea trabou i stazje pa e hóbennan aki pa asina nan por keda aloká riba merkado laboral. Ademas nan lo risibí training i kursonan pa yuda nan den nan tarea di eduká nan yunan komo mayornan responsabel.

Durashon di e trayektonan ta dos aña i ta repartí den un trayekto di preparashon di 3 luna, e trayekto prinsipal ku ta dura 18 luna pa siña un fishi i e trayekto di kuido despues di 6 luna. Durante nan trayekto di formashon e hóbennan ta haña un kompensashon pa kubri nan gastunan mas importante i transporte pa nan por yega na e fasilidatnan kaminda e trayektonan ta tuma lugá. Tambe ta paga gastu pa e yunan di e hóbennan aki por haña formashon na sentronan pre eskolar.

Hulanda a pone Nafl. 5.000.000 disponibel pa traha na formashon di e hóbennan aki. Pa e aña aki ya tin mas o ménos 400 hóben ku a start ku un trayekto. Tin 8 organisashon ku ta ofresé trayektonan riba tereno di Handy Man, Kuido di mucha i ansiano, Telefonista, Resepshonista, Konstrukshon i Horeca. Ta trata aki di Q-Opleidingen, Fundashon 4-S, Fundashon Union pa Hubentut, Stichting Vormingscentrum voor Jeugdwelzijnswerk, Bon Futuro, Sifma, Pro Alfa i Feffik.