Despues di e eksperensianan troumátiko for di 2008, mayoria empleadonan di e tres otro fakultatnan i e servisionan relatá na UNA no tin sinti niun nesesidat pa akshon i inkietut atrobe ku ta perhudiká nan mes, e studiantenan i UNA en general. For di djaluna e Rector lo bolbe splika e situashon na tur empleado den seshonnan informativo. E universidat tin problema urgente i struktural ku ta rekerí atenshon spesial i ku no por pisa mas ku e opheshonnan di SEF i AF kontra nombramentu di un dekano na nan fakultat. Apesar di e aktual impase e Rector ta keda boga riba un forma konstruktivo pa pone un paro na e akshonnan i e protesta. Ademas e lo hasi tur loke ta na su alkanse pa laga enseñansa na e studiantenan sigui sin interupshon i pa tene e interes di UNA den su totalidat na bista.

E Rector ta denominá komo sin sentido, destruktivo i masha dañino pa UNA e eskoho ku AF i SEF a hasi te awor deliberadamente pa protestá i skohe pa akshon na lugá di diálogo konstruktivo. Pa por kibra e impase, for di djaluna e lo organisá tambe tanda di diálogo riba nivel individual. Kualke wèlga òf otro akshon no ta deseabel. Mester buska e solushon na mesa i no pa medio di protesta i akshon, segun e Rector.

Nombramentunan ta legal

E dos dekanonan nobo ku e Rector a nombra di afó pa e dos fakultatnan ta kompletamente segun lei. Esei e dos fakultatnan no ta kuestioná tampoko. Konforme e prosedimentunan den lei a tene kuenta tambe ku e argumentunan ku SEF i AF a presentá. Si apesar di esei e fakultatnan ta keda tin problema ku e desishon di nombramentu, anto e úniko alternativa ku a keda nan, segun e Rector, ta pa nan akudí na Korte, pero e paso ei a dos fakultatnan ta blo deskartá. Na lugá di esei nan a purba krea un nubia di inkietut i duda atraves di informe den medionan di komunikashon i den tur esei nan a purba kuestioná tambe nombramentu di e Rector i e Hunta di Supervishon. E nombramentunan aki tambe nan por hiba dilanti mesa bèrdè si nan ta kere ku nan tin argumento válido.

E konsiderashonnan di e Rector pa buska dos dekano di afó pa e dos fakultatnan aki tin di haber ku su plannan i su vishon pa UNA i e situashon organisatorio aktual na e fakultatnan e kestion. Ademas ta di importansia grandi ku ta bini un aserkamentu fresku kaminda ta traha espasio pa kambio riba nivel di fakultat i pa medio di esei tambe drecha koperashon den henter UNA. No tin un sistema real di check & balances, ni no por ehersé un direkshon firme si UNA keda dependé di un sistema di rotashon interno di dekano pa kada fakultat. Riba e punto aki lei tambe ta papia palabra kla. Loke ta sobra ta ku un parti di e personal no ta di akuerdo ku esaki. Rector Goede: “Tur hende sa topa nan ku situashonnan kaminda nan no ta gusta nan hefe. Pero bo no por usa akshon pa logra e derecho pa bo nombra bo mes hefe”.

Hunta di Personal

E Rector a hasi un yamada na e empleadonan en kestion pa tene kabes friu i kontribuí na solushon pa medio di koperashon konstruktivo. P’esei e ta lamentá altamente ku den e siman tras di lomba e dos fakultatnan aki a violá tur regla normal rondó di mediashon di Mediadó di Gobièrnu. E Rector ta hasi un yamada riba tur empleado di UNA pa nan bai tras di loke e kanalnan ofisial di informashon na UNA ta reportá, manera e Hunta di Personal, e Hunta di Studiante, e sentro di servisio na studiante, e Rector mes, etc. Nan mester realisá tambe ku e akshonnan na dos fakultat ta kita atenshon for di asuntu realmente urgente ku ta toka interes pa tur hende na UNA, manera fayo di likides, a surpasá presupuesto, akreditashon, servisio na studiante, etc. E diálogo ta kuadra ku e kambio di kultura na UNA ku a anunsiá anteriormente.