Durante e deliberashonnan partidonan a determiná den presensia di Mediadó di Gobièrnu Alfeo Profas ku e nombramentu di e dekanonan na e Fakultat General (AF) i e Fakultat di Siensia Sosial Ekonómiko (SEF) ta kompletamente legal i ku e prosedimentu ku a apliká ta kuadra segun e lei di UNA (LUNA). Apesar ku e fakultatnan no ta di akuerdo ku e resultado, nan no ta kuestioná legalidat di e desishonnan ku a tuma. E huntanan di fakultat a preferá pa no reakshoná riba e pregunta pakiko nan no ta akudí na korte riba e punto aki. Ademas, gerensia di UNA bou di mando di Rector Dr. Miguel Goede a indiká ku den su desishon pa nombra dekano el tene kuenta riba diferente punto ku loke e fakultatnan a trese dilanti. Ke men, ya a hasi konseshon na AF i SEF.

Den e enkuentro ku e Mediadó di Gobièrnu a papia riba mas konseshon. E huntanan di fakultat sinembargo no tabata dispuesto pa pone un paro na e akshonnan ku ta andando pa algun dia kaba, e agitashon bou di personal di UNA distribuyendo informashon interno na empleadonan di UNA i e echo ku konstantemente ta krea intrankilidat atraves di medionan di komunikashon. E posishon ei a laga masha tiki espasio pa Rector aserká nan mas pa por sigui ku e mediashon. E huntanan di fakultat a keda para duru riba nan deseonan i no a mustra insufisiente rèspèt pa e intento di mediashon di Mediadó di Gobièrnu.

Den e konteksto aki i na interes di universidat i spesialmente e studiantenan, gerensia di UNA a pidi minister pa proklamá un cooling off period (periodo pa fria kabes) na UNA di moda ku e enseñansa no tin nodi sufri bou di esaki. E Rector ta keda dispuesto pa diálogo por ehèmpel pa konhuntamente determiná e kriterionan pa kandidatonan pa dekano den futuro, pero bou di preshon di e akshonnan ku a sigui na 2 di e 5 fakultatnan no tabatin espasio pa esaki. E Rector ta lamentá ku e huntanan di fakultat a tuma e posishon aki, mas ainda pasobra e diferensia di opinion no ta hustifiká e akshonnan ku e sindikato i huntanan di fakultat a kuminsá.