Djaluna e kòmbersashonnan ku e dos fakultatnan ta kuminsá bou di guia di Mediadó di Gobièrnu enkuanto relashonnan saludabel pa trabou pa logra pa e aña akadémiko 2010-2011 kana optimalmente. Djabièrnè último e Rector a inisiá esaki despues ku e puntonan d bista di e dos huntanan di fakultat a intensifiká fin di siman pasá. Apesar ku a planifiká e diálogo aki, pa kua e huntanan di fakultat a konsentí, djadumingu e sindikato ABVO a anunsiá ku nan ke reuní na UNA bou di ora di trabou. Atraves di un yamada riba Internet (facebook) otronan a hasi un apelashon riba e studiantenan pa un manifestashon di protesta na e mesun ora. E Rector ta lamentá ku ta purba hinka e studiantenan den un asuntu ku un kestion di personal. E Rector a sigurá e hunta di studiante ku e ta hasi tur loke e por pa garantisá ku enseñansa ta sigui sin interupshon. Esei p’e tin e prioridat mas haltu.

E Rector a indiká ku na un universidat protesta mester ta posibel, i konsulta ku miembronan di e sindikato tambe, pero esei mester sosodé di tal moda ku e no ta stroba e programa normal di enseñansa i ku no por tin disturbio òf ku deliberadamente a krea inkietut. P’esei el a insistí pa konsulta asina tuma lugá pafó di e oranan normal di trabou, ya ku por konsiderá un reunion bou di ora di trabou komo un forma di akshon. Ademas, e ta sali for di e punto di bista ku e personal i e sindikatonan ABVO i Sitek, na kua e huntanan di fakultat a akudí djabièrnè último, ta tuma e intentonan di mediashon na serio i ku nan ta duna nan kontribushon na esaki.