Na aña 1970 yùfrou Scharbay a kuminsá laborá na Prins Bernhardschool i 1971 i 1972 e tabata hefe di Johan van Walbeechschool. Na aña 1973 el a kuminsá duna lès na Helfrich school kaminda el a permanesé i finalisá komo kabes di skol e aña eskolar tras di lomba.

Yùfrou Claudette semper a mustra konvikshon, determinashon i perseveransha pa yuda hasi e diferensha den enseñansa. Na tur e la traha 40 aña den enseñansa i semper pa skolnan públiko. E dinamismo, e retonan, inovashon den enseñansa i tambe e populashon di alumno ku ketu bai ta kambiando, a inspir’é semper den su vokashon komo maestro di skol.

Ta bale la pena menshoná ku ademas yùfrou Claudette semper tabata aktivo den sindikato pa maestronan di skol kaminda for di 1980 te ku 1988 e tabata komisario pa enseñansa preparatorio den sindikato. Despues di 1988 el a bira kolaboradó. Awor ku el a kumpli su edat di baha ku penshun el a retirá ku un sintimentu grandi di satisfakshon pa e trabou di edukadó ku el a logra ku nos muchanan. Diputado Marilyn Alcalá-Wallé a gradisí yùfrou Claudette inmensamente pa su aporte duná na enseñansa i alabes e diputado a ekspresá ku sigur mas ku tres generashon lo sigui rekord’é den nan memoria mirando e ròl importante i e impakto ku un maestro tin den bida di un mucha.