Ademas di esei e programa tin un suma pa fortifiká e aspekto organisatorio di e diferente institutonan den enseñansa (institutionele en organisatorische versterking). Servisio di Asuntunan di Enseñansa te ku resien tabata e órgano ku na nòmber di gobièrnu tabata responsabel pa traha e diferente plannan i aktividatnan ku tin ku tuma lugá den kuadro di inovashon. Na nòmber di Bestuurscollege e Servisio tabatin e  enkargo pa atendé alabes ku e aspekto finansiero relashoná ku ehekushon di inovashon.

Durante ehekushon di e programa aki sinembargo dos direktiva di skol esta RKCS i VPCO a duna di konosé ku nan ke tin mas partisipashon den ehekushon di e programa di inovashon di enseñansa. Gobièrnu di Kòrsou huntu ku gobièrnu di Hulanda ku ta pone e medionan disponibel a yega na un akuerdo ku e dos entidatnan aki ta risibí mandato di Bestuurscollege pa den e kuadro di e programa di koperashon di enseñansa i e metanan stipulá dentro di e proseduranan, e dos direktivanan aki ta haña e espasio pa nan mes entregá proyekto. Anteriormente esaki no tabata posibel. Resultado di e desishon aki ta ku e direktivanan di skol menshoná tambe ta responsabel pa ehekutá i reportá tokante di e progreso den ehekushon di e proyektonan na Bestuurscollege. Esaki ta nifiká ku na e momentu nan aki tin tres instansha, dentro di e budgetnan ku tin disponibel, por entregá proyekto esta SAE pa tur e direktivanan di skol supsidiá pa Gobièrnu di Kòrsou inkluyendo skolnan públiko, RKCSB i VPCO.

Despues di diferente seshon di interkambio entre diputado di Enseñansa, Kultura i Deporte señora Marilyn Alcalá-Wallé i e direktivanan di skol tokante di kua aspekto tin ku keda sentral i kua aspekto por wòrdu delegá na direktivanan di skol a yega na un akuerdo kon ta repartí e medionan finansiero. Mirando e desaroyo, Bestuurscollege a bai di akuerdo ku kaminda e otro direktivanan di skol ta sinti mesun nesesidat pa nan tambe entregá nan propio proyektonan, esaki tambe ta posibel.