| Hopi espektativa pa bishita di e barku di treinen BE Cuauhtemoc di marina di Mexico |
|
|
|
| Sunday, 01 August 2010 - 23:49 | ||||
Tur kos ta práktikamente kla pa
bishita di e barku di treinen di marina di Mexico “BE Cuauhtémoc”. Konforme su
itinerario, “BE Cuauhtémoc” lo drenta haf di bahia Santa a, djarason awor 4 di
ougùstùs pa 8’or di mainta. Klik read more pa mas informashon...
Pa e personanan ku ke mira e entrada di e bunita
barku aki ta rekomendabel pa nan ta for di 7.30’or di mainta na pia di brùg pa
asina disfrutá di un bunita espektákulo. Ainda nos ta kòrda entrada di e barku
na aña 2007, momentu ku e a drenta nos haf ku músika di mariachi ku su kadetenan
para riba e mast di e barku. Probablemente esaki lo ta e kaso atrobe. Lo ta un
oportunidat úniko pa nos duna tantu e barku komo su tripulante i kadetenan un
bon biní, komo un bon anfitrion manera nos ta.
Dirèkt na su yegada, despues ku e
barku kaba di mara na Matheywerf, lo sigui un akto protokolar pa risibimentu di
e barku dor di entre otro representantenan Curaçao Sail Foundation, Vise Kònsùl
di Mexico, i tambe otro funshonarionan di Marina Real. Pa e bishita di “B.E.
Cuauhtémoc”, un biaha mas Curaçao Sail Foundation a prepará un programa
interesante pa e tripulante komo pa e kadete i ofishalnan. Entre otro lo tin
algun bishita ofishal serka nos mandatarionan i tambe algun rekorido rondó di
nos isla. Dia 5 di ougùstùs pa 9’or di mainta lo tin un ofrenda floral na e
monumento di Almirante Luis Brion. Interesante lo bira e partido di futbòl
amistoso entre e miembronan di "B.E. Cuauhtémoc" kontra e tim di
Futbòl “Matrix”, komo promé parti di e wega di djabièrnè 6 di ougustus den e
kampeonato “Insel Air International Club Football Cup 2010”. E wega amistoso aki
ta tuma lugá 6’or di atardi na Stadion Ergilio Hato na
Brievengat (SDK).
Meskos ku añanan anterior, e
biaha aki henter komunidat i speshalmente tur nos hóbennan tin e oportunidat pa
bishitá e bunita barku aki. E oranan di bishita ta riba diahuebs 5, diabierne 6,
diasabra 7 i diadumingu 8 di ougùstùs di 10’or di mainta pa 10’or di anochi.
“B.E. Cuauhtémoc” lo ta mará na Matheywerf Otrabanda
Curaçao Sail Foundation un biaha mas ke hasi un invitashon na henter
pueblo di Kòrsou i speshalmente na nos hóbennan, pa ban duna e barku di treinen
“BE Cuauhtémoc” un kaluroso bon biní den nos haf i si tin oportunidat pa hasi e
barku un bishita. “BE Cuauhtémoc” lo sali for di haf djaluna 9 di ougùstùs pa 12’or
di mèrdia.
|
||||
