For di e momento aña pasá ku KLM a bira 100% doño di Martinair, e dos kompanianan di aviashon a studia e método pa meskos ku na otro kaminda nan sinkronisá e forma di manehá e dos empresanan na Aruba i Kòrsou i pa hasi esaki di e moda mas efisiente. Na e establesimentu ku ofisina na Kòrsou i Aruba esei a resultá den un organisashon uniforme tantu pa KLM komo Martinair na Kòrsou i Aruba. Despues ku dos luna pasá ya a integrá e ofisinanan na e aeropuertonan, e personal di e dos kompanianan na e dos islanan a logra komo promé den e nètwèrk mundial pa hinka e otro departamentunan tambe kompletamente den otro i pa sigui komo unidat. For di febrüari e aña aki, ora a kuminsá ku e proseso aki, e ofisinanan na e aeropuertonan Reina Beatrix na Aruba i Hato na Kòrsou a bai huntu. Entrante dia 1 di yüli último e ofisinanan di benta di pasashi, e sekshon pa atendé buelo na tera, e atministrashon i e sekshonnan di merkadeo tambe a integrá kompletamente.

E ofisina prinsipal di e establesimentu Karibense ta keda na aeropuerto Hato, kaminda KLM i Martinair tambe ta mustra pafó ku nan ta bou di mesun dak. Riba dak di e ofisina ei tin e logo komersial nobo di e empresa. Nan ta keda dos brand riba merkado internashonal, pero pa finnan komersial nan a uni forsa i medionan. Gerente General Simone Wickenhagen di KLM-Martinair ta splika: “Tur dos marka ta keda eksistí banda di otro, pero for di awor kliente di tur dos por reservá i kumpra pasashi di tantu KLM komo Martinair na e mesun ofisina di benta”.