Gobièrnu mester hasi tur loke ta den su alkanse pa riba 10 di òktober 2010 tur loke ta konserní empleadonan públiko ta bon reglá. Asina nos por tin un bon base sólido den e aparato gubernamental pa kuminsá “10-10-10”.

No por kuminsá “10-10-10” ku ámtenarnan malkontentu i insatisfecho ku e oferta ku nan a haña. Mester duna bon atenshon na e ámtenarnan. Asina nan por kuminsá duna servisio den Pais Nobo bon prepará, i nan por sirbi e pueblo ku un mente sano i un moral haltu.

Ámtenarnan ta kara di e Servisionan di Gobièrnu i mester duna nan balor i espasio pa nan por sigui krese den e Pais Nobo. No por kontinuá ku e situashon aktual kaminda kasonan di ámtenarnan, ku pa hopi aña kaba ta wardando, ainda mester sigui warda riba un kontesta riba nan petishon pa un bevordering of un overplaatsing. Hopi biaha ta dura lunanan largu, i hasta mi por bisa añanan largu, pa nan haña un kontesta riba un petishon asina.

Si nos por kuminsá trata tur petishon di ámtenarnan den un tempu hopi kòrtiku, mi ta kere ku esei por ta un muestra ku nos ta riba e bon kaminda pa Pais Kòrsou. Ami, Junny Chirino, un empleado públiko i kandidato no. 13 riba lista di MFK, sigur lo boga pa e momento ku pueblo duna MFK e sosten dia 27 Ougùstùs 2010. Mi ke pa ámtenarnan sinti nan mes mas bon bini ku ta posibel i mas serka di gobièrnu ku nan ta representa. E gobièrnu di Pais Kòrsou mester duna nan aporte, i skucha nan, pa asina por solushoná nan problemanan. Solamente asina por duna nan e konfiansa ku e gobièrnu nobo ta di nan, i pa nan.
Si e Gobierno den Pais Nobo ta duna ámtenarnan prioridat haltu, por kosecha e frutanan di esei pasobra lo tin ménos frikshon entre gobièrnu komo dunadó di trabou i su empleadonan. I tambe, si duna ámtenarnan espasio pa traha, i pa sigui siña i desaroyá nan mes, lo limitá nesesidat pa duna trabou na konsultants eksterno, ku awor aki na bòshi ta hasi trabou di ámtenarnan, ku nan mes por a hasi mes bon (of hasta mas mihó) ku e konsultants eksterno.

Un kos sí mi tin ku bisa. E ámtenarnan tambe mester hasi nan trabou na un manera optimal, i nan mester sigui desaroyá nan mes pa asina nan por duna komunidat un servisio mas mihó ku ta posibel.

Ku esaki, e konfiansa den nos aparato gubernamental ta bini bek serka nos suidadanonan. Awor aki hende fásilmente ta papia hopi negativo di ámtenarnan, pero si invertí den nan, sigur sigur pronto nan por konta riba elogio di e pueblo pa motibu ku nan ta ehemplar den dunamentu di bon servisio.