“Pidi un deseo” ta kontene  13 piesa, den nos dushi idioma Papiamentu, kompositor di  tur letra na Papiamentu tabata den man di Dhaddy Brokke.

Un produkshon ku e biaha aki, pa promé biaha e mes a toka mayoria instrument,  Abo of ningun, Si bo ke amor  huntu ku Mariachi Azteca, Drumi ku bo, Manera mi amor, E inkondishonal, y Soña  ta algun di e tema nan ku ta aparesé riba e produkshon aki.

Tur ta tema  ku Tony mes ta gusta masha hopi.

Tony ta mira e produkshón aki  “Pidi un deseo” manera un yu  ku a tuma  9 luna pa  preparé ku hopi amor ku un imenso dedikashon y  pa awe e ser  presenta.

E produkshon aki “Pidi un deseo” segun Tony Sherman ta esun ku ta mas pegá na su kurason, pa e hecho ku e mes a ko produsié,  huntu ku e produktor Leon Sherman.

“Pidi un deseo” ta e kulminashon di 48 aña di karera artistiko, huntu ku e apoyo di e.o su manager y amigu Robby Schouten ku for di su 15 aña  ta apoyé 100%.

Toni Sherman ta mira bek riba hopi exito, entre nan  ku e la   haña e oportunidat pa biaha masha hopi parti di mundu,  kanta y traha ku diferente  artista grandi manera Shirley Bassey,  Steve Wonder, y otro nan y sin lubidá tur  presentashon ku ela hasi  na nivel lokal huntu ku artista nan di Aruba y Kòrsou y sin lubida e duo  Dhaddy y Tony.

Aktualmente, Tony Sherman ta biba na  Spaña pa ser eksakto na Gran Canaria y ta explota su propio empresa artistiko, ku masha exito.

Toni Sherman ta spera di henter su kurason ku e produkshón aki haña un lugá spesial serka un y tur den nan kolekshón y ku pronto le por ta huntu ku nos pa estrená y  kanta tur e tema nan aki.