GGD i Fundashon di Konsumidó ta risibiendo hopi pregunta relashoná ku un tipo di piska ku ta wòrdu bendé ku públiko bou di e nòmber Mero, miéntras esaki no ta e piska Mero ku nos konosé. GGD huntu ku Inspekshon di Salubridat a hasi inspekshonnan den diferente establesimentunan ku ta bende piska prepará kaba i pa prepará na kas, i a konstatá ku diferente establesimentu ta hasi uso inkorekto di e nòmber di e piska Mero. Konsekuentemente e establesimentunan aki ta kometé un violashon di nos leinan ku ta regardá produktonan di kome, puramente ku e meta pa saka benefisio finansiero.

MERO

Pa duna un ehèmpel e piska di e tipo Mero ku nos konosé ta kosta fl. 24,- pa fl. 30,- pa Kg (kilo) i ta pertenesé na e famia di piska ku ta wòrdu yama Grouper. Mero ta un piska fini i dushi i ta hopi gusta lokalmente

Pagasius òf Swai

E piska aki ku ta keda bende komo Mero su preis ta entre fl. 8,- pa fl, 14,- pa Kg (kilo) i su nòmber original ta Pagasius of Swai i apsolutamente e no ta un piska dañino pa salú di hende. Pagasius òf Swai ta un piska kultivá den sistemanan kontrolá i den awa dushi.

Nan ta krese den tempu rekòrt i ta prosedente di Oriente. Rònt mundu esaki a para bira un negoshi grandi.

ILEGALIDAT

E hecho ku ta bende e piska aki ku e públiko konsumidó bou di e nòmber di Mero ta ilegal konforme artíkulo 30 di e lei di Etikèt (P.B. 2005, no. 16.). Konforme e lei aki riba tur produkto di kome mester identifiká e nòmber korekto i sin manipulashon di e nòmber òf e kontenido di e ingrediente di e produkto.

GGD huntu ku Inspekshon di Salubridat ya a atvertí diferente bendedó di e violashon aki. Un atvertensha serio ta bai na tur bendedó ku den kaso ku durante inspekshon(nan) ehersé keda konstatá ku ta usa nòmber inkorekto lo tuma e produktonan aki den beslag i nan lo keda destruí.