E minister a yega Korsou djadumingu 27 di yüni. E parti ofishal a kuminsa djaluna mainta ku un bishita na gobernador Frits Goedgedrag y despues na minister presidente Emily de Jongh-Elhage, minister di Asuntunan Constitucional y

Asuntunan Interno Roland Duncan y minister di Trafiko, Transporte y Telekomunikashon Patrick Illidge. Ku su kolega Illidge e minister lo firma un akuerdo di koperashon. Merdia e mandatario tabata tin un enkuentro ku Konseho ehekutivo di Korsou.

Djamars mainta 29 di yüni Eurlings ta bula bin Aruba kaminda primeramente lo e bishita – huntu ku sekretario di Estado Bijleveld-Schouten (Relashonan den Reino) – gobernador interino Alicia Tromp-Yarzagaray. Eurlings lo papia tambe ku minister-presidente Mike Eman. Ku su kolega Otmar Oduber, Eurlings lo sera despues un akuerdo tokante koperashon riba tereno di kontrol di trafiko aereo entre Aruba, Korsou y e islanan BES pa kual Hulanda lo ta responsabel despues di 10-10-10. Ademas, Eurlings lo papia djarazon ku minister Benny Sevinger tokante renobashon urbano na Oranjestad, y e ta bishita despues e haf di konteiner y e haf na Barcadera.

Djarazon merdia e minister ta sali ku su delegashon pa Islariba. Prome nan ta bai Saba, kaminda pa djahuebs mainta tin plania bishita na Konseho ehekutivo y ‘Regionaal Service Centrum’ (RSC). Parti di merdia Eurlings ta sali bai St. Eustatius, kaminda lo e realisa un programa similar. Un dia despues St. Maarten ta riba programa, ku un bishita na gobernashon di e isla y na Servisio Meteorologiko.

E bishita di trabou ta termina na Boneiru ku entre otro bishita na Konseho ehekutivo y e empresanan di transporte Rocargo y Don Andres. Djaluna mainta e minister ta duna e tiru pa start renobashon di e pista di aeropuerto y di aterisahe na Flamingo Airport y e ta biaha bek pa Hulanda djamars atardi.