Danzarte Studio ta un organisashon ku tin komo meta pa yuda eduká i desaroyá nos hóbennan den e arte di teater i arte pa asina yuda kontribuí den desaroyo sosial di nos komunidat. Na Danzarte Studio, hóbennan di entre 6 pa 18 aña ta haña e oportunidat pa siña i trein den e disiplina di  baliamentu na laira, akrobasia, trapesio i kanamentu riba stèlt. E hóbennan su prestashon i kalidat artístiko ta di un nivel hopi haltu, loke ta resultá den hopi invitashon, pa e grupo presentá pafó di Kòrsou. Ya kaba a duna aktuashon na diferente show eksitoso na diferente pais. 

‘Spil’ ta un presentashon manera un kuenta di hada, kaminda nada no ta manera e ta mustra. Grupo di arte teatral di sirko, Danzarte, ta tene un spil dilanti di su mes i e públiko, usando bailamentu den trapesio i telanan, akrobasia den airu, aktuashonnan teatral, kombiná ku bailamentu moderno i kanto. E aktuashon impreshonante i e presentashon profeshonal di e artistanan hóben ta okashoná momentunan impaktante kaminda hende sa lubidá di hala rosea. 

Karchinan ta optenibel na Hunkemöller (Promenade), Vista Bike, Mister Pan na Punda, Mensingh’s Caminada i serka miembronan di Danzarte na rason di 20 florin. Ta un bunita oportunidat pa mira nos hóben artistanan lokal di nivel internashonal dunando un presentashon memorabel úniko na komunidat di Kòrsou 
Pa mas informashon tokante Danzarte Studio su kursonan di arte teatral di sirko i e presentashon ‘Spil’ por konsultá e wepsait www.danzartecuracao.org òf yama telefòn 526-0846.