Despues di un periodo intrankil na e universidat lokal, dia 6 di aprel 2009 Hunta di Supervishon a nombra dr Silberie komo Rector Magnificus interino pa máksimalmente dos aña pero ku e posibilidat pa kaduká esaki antisipadamente. Su tarea primordial tabata pa tene e kanalnan di komunikashon habrí, pa enseñansa i investigashon sientífiko kana manera debe ser i pa restablesé trankilidat na UNA.

Antisipando fin di e periodo interino, fin di aña pasá Hunta di Supervishon a kuminsá un proseso konforme e prosedimentu di selekshon manera lei ta preskribí pa nombra un Rector atrobe pa e periodo regular di kuater aña. Den esaki e hunta a laga un Komishon di Konseho asistié ku ta konsistí di tres hende hòmber ku un trayektorio largu nan tras, esta Mr. Mike Alexander (notario), ir. Gilbert Wawoe (anterior miembro di Hunta di Konseho di Gobièrnu di Reino) i Mr. Frank Promes (abogado i èks Abogado General). Den e ehersisio aki a haña un kandidato nobo serka di kas, manera deseá, den e persona Dr. Miguel Goede (48). For di 2002 e ta traha na UNA; promé komo dosente, kordinadó di programa i dekano (2005-2007) na e fakultat Sosial Ekonómiko i for di 2009 komo dekano na e fakultat Komunidat i Siensia di Kondukta.

Na 1987 Dr. Goede a optené su título di Master den politikologia, atministrashon públiko i kondukta di organisashon na e universidat di Nijmegen. Na 2005 el a doktorá den atministrashon públiko na e universidat di Tilburg. Promé ku el a kuminsá su karera akadémiko, señor Goede tabata na kabes di ‘Stafbureau’ di Teritorio Insular di Kòrsou i direktor di Dutch Caribbean pa e ofisina internashonal di Arthur Andersen Consulting.

Presidente Herman Behr di Hunta di Supervishon: “Entre otro su edat relativamente hóben, su kalifikashonnan akadémiko i no na último lugá su konosementu di e problemátika aktual i su vishon riba futuro di UNA a konvensé Hunta di Supervishon i e Komishon di Konseho ku e ta e mihó kandidato pa e funshon importante aki. Nos tin bon speransa ku e ta kapas pa duna UNA e entusiasmo nobo pa un desaroyo di e instituto importante aki. UNA por i mester hunga un papel prominente den desaroyo mas avansá di Kòrsou komo pais i komo universidat nashonal e mester produsí esnan pa posishonnan haltu i e liderazgo nesesario nobo pa Pais Kòrsou bira un éksito”. 

Gratitut

Anke e Hunta di Supervishon internamente no a spar su krítika riba puntonan di maneho, e hunta ta gradesido na Rector interino Silberie pa e echo ku el a logra trese trankilidat bèk na UNA i ku enseñansa no a sufri mas despues di un periodo bastante tumultuoso. Presidente Behr di Hunta di Supervishon ta opservá: “Señor Silberie a hasi komunidat di UNA un fabor, pasobra anke el a baha ku penshun e tabata dispuesto pa regresá i tuma e enkargo temporal pisá aki riba dje”.

Aktualmente UNA ta pasando den un situashon finansiero di prekupashon. Aparte di mester prepará kuminsamentu di e aña akadémiko nobo, e Rector Magnificus nobo tin e tarea tambe pa riba término kòrtiku presentá un pakete di medida pa drecha finansa di UNA i tres’é bèk dentro di e presupuesto akordá.