E situashon ta simplemente ku na Korsou ta mantené korementu na man drechi di e kaminda. Esaki ta enserá, ku e autonan ku ta kore na Korsou mester tin e stürwiel instalá na man robes di e vehikulo, pa alineá mas optimalmente ku e punto sentral di e karetera, kaminda e chauffeur tin e mihó bista riba trafiko. 

Fabrikantenan di auto ta invertí  biyones di florin pa inkorporá stürwiel na man robes of drechi, dependiendo e merkado. Si nan lo a pone e stürwiel na un luga so, nan lo a skapa pues hopi biyones. Pues mas ganashi! Dikon nan ta hasi tur e esfuerso aki? Pasombra un auto ku e stürwiel na e luga korekto pa e trafiko na kual e ta partisipá, ta simplemente mas sigur. Pues un auto ku ta kore den un trafiko na man robes manera ta e kaso na Gran Betaña, ta mas sigur si e stürwiel ta na man drechi. E ora ei e chauffeur tin un mihó bista riba trafiko i e ta sintá ademas na e luga optimal pa ora e ta lora bocht. Bocht grandi na man drechi, bocht chikitu na man robes. Den e kasonan aki e auto ku sturwiel na man robes ta simplemente mas difisil pa e bista i pues mas peligroso den trafiko. Pa trafiko na man drechi di Korsou e situashon ta al reves. 

Na Korsou doñonan di autonan ku stürwiel na man drechi tambe ta realisá ku nan vehikulonan ta krea situashonnan peligroso ora ku nan kier pasa un auto. Pa e motibu ei nan ta trese e argumento, ku pasa auto eigenlijk no ta nesesario. Segun nan e ora ei bo ta un chauffeur mas sigur i nan ta tira tur chauffeur ku ta pasa auto den e mesun monton, komosifuera tur ta chauffeurnan peligroso. Pero pasamentu di auto ta un piesa normal den trafiko. Un chauffeur ku ta koriendo mas duru ku un otro mester por pasa otro i lei ta diskribi e prosedura di pasamentu na varios kaminda. Pero pasamentu di auto no nesesariamente ta sosode na velosidad so tampoko. E por sosode tambe ora mester pasa un auto ku a keda stashonario riba karetera. E hecho ku un auto a keda stashonario riba karetera por sosode pa varios motibu. E auto por a daña, haña flettayer of e chauffeur por a bira malu of konfrontá un situashon peligroso, ets. E ora ei, e auto ku ta kore patras di esun ku a stop lo kier pasa esun dilanti aki. Si e stürwiel ta na e luga korekto pa e tipo di trafiko, no tin ningun problema. Pero si e auto ku ta koriendo patras tin e stürwiel na e luga robes pa Korsou, pues na man drechi, e chauffeur di e auto ei lo konfrontá un problema masha grandi, pasombra lo e no tin bista riba e trafiko kontrali. Sigur no, si e auto dilanti ta por ehempel di un tipo mas haltu (SUV of pickup truck) of tin glasnan skur. E ora ei ta praktikamente imposibel pa e auto patras hasi un analisis di e trafiko kontrali. E lo mester tira un pará, door di purba pasa e auto dilanti tog, sin ku ela tuma bon nota di e situashon di trafiko kontrali. Pero, si resulta na e momentu ei, ku si tin trafiko kontrali ta bin, e chauffeur di e auto ku e stürwiel na man drechi lo a krea un situashon sumamente peligroso. Lo depende di puro suerte, ku un aksidente di trafiko no ta tuma luga na e momentu ei. For di esaki por dedusi klaramente ku un auto ku stürwiel na man drechi no ta sigur pa e trafiko na Korsou. 

Tin diferente situashonnan den trafiko di Korsou, kaminda ku chauffeur di un auto ta haña su mes ta hasi interakshon ku un otro instansha, ku tambe ta partisipá den trafiko. Por ehempel tin kontrol di polis. Of tin kareteranan kaminda tin un portier of un mashin ta regla e trafiko. Ahinda si ta trata di un hende, e situashon spesial di e auto ku stürwiel na man drechi por wordu solushoná lihe. E polis of e portier por kana bai serka e chauffeur. Pero si ta trata di un mashin, lihe asina e chauffeur ku e stürwiel na man drechi ta krea un pegamentu di trafiko. Na entrada di e luga di parker na aeropuerto por ehempel tin un mashin kaminda e chauffeur mester primi un boton pa e haña un karchi. E machin aki naturalmente ta poné pa atende ku e tipo normal di trafiko na Korsou, ku stürwiel na man robes. E chauffeur ku stürwiel na man drechi tin un problema grandi einan. E lo tinku sali for di su auto, pasa rond di su auto pa yega na e mashin. Mientras tantu sobra trafiko tinku warda riba dje. Na salida for di e luga di parker e situashon ta mas ferfelu. Einan e tinku mustra su karchi pa despues paga. Djis imagina bo, si e no tin e sen pareu ku e karchi!!

Mirando esaki ta fasil yega na e konklushon, ku e auto ku stürwiel na man drechi no ta bon pa Korsou i ku mester eliminá su uso den nos trafiko. Kisas ta difisil pa hasi algu kontra di esnan ku ya tei kaba, pero en todo kaso mester stop e importashon di e autonan aki mas lihe posibel. Gobiernu por regla esaki fasilmente via di un Eilandsbesluit.