Ántes e bida di kunuku tabata unu hopi saludabel aki na Boneiru. Hendenan tabata kultivá nan propio kuminda, biba den aire fresku i disfrutá di trankilidat i simplesa na abundansia ku a resultá  ku e hende tabata biba hopi mas largu. Kontrario na otro paisnan unda e bida di kunuku ta kondusí na hopi pobresa i kousa di hopi morto i enfermedat.

Awendia mayoria hende ta skohe pa laga e bida di kunuku pa un bida den sentro di suidat, sabiendo ku nan ta kore riesgo ku nan kustumbernan, salu i bienestar i trankilidat por wòrdu afektá. Prinsipalmente ora  skohe pa biba den un suidat ku poblashon intenso i kaminda hopi hende ta biba riba otro, hibando un bida hopi okupá i kaótiko. Den suidat  mayoria bes  kriminalidat, malesanan kontagioso, malesanan  króniko, adikshon i hendenan ku sintoma di stress ta haltu. Tambe hopi biaha norma i balornan, kustumbernan i manera di biba ta diferente for di e bida di kunuku. Bibando den sentro di suidat e hende por  kambia di aktitut i komportashonnan sano pa unu ménos sano manera kore den outo o bus, move ménos i ta skohe pa alimentashon insaludabel.

Hendenan ku ta biba en un suidat ménos pobla tambe ta kore riesgo ku nan kustumbernan, salu i bienestar i trankilidat ta wòrdu afektá si e poblashon wòrdu multipliká rápido sin kontròl dor di imigrashon di hende.

Boneiru ta pasando den un proseso estatal i mester mantené kontròl riba e kresementu di e poblashon pa por protehá kustumbernan, trankilidat, norma i balornan i espíritu di trankilidat i pas riba e Isla. Tambe mester  promové i mantené e kalidat di bida di habitantenan di Boneiru na un nivel haltu.

Planifikashon di nos infrastruktura i optimalisashon di kalidat di nos servisionan públiko i di kuido ta nesesario pa por protehá nos hendenan kontra faktornan ku por influensha salu públiko i kuido i formashon di nos pueblo.

P’esei,  gobièrnu di Boneiru  kier hasi un apelashon fuerte na tur trahadónan den tur NGO nan i tambe henter e komunidat Boneriano pa uni forsa  pa huntu nos por traha riba redukshon di kriminalidat, mantenshon di nos naturalesa limpi i puru, di nos skolnan  i tambe riba mantenshon di tur fasilidatnan i instansianan públiko manera sentronan di bario, klínika di dòkternan, instansianan ku ta duna kuidonan i parkenan públiko etc.

Diputado  Janga, ta manda un gradisimentu fuerte pa henter komunidat Boneriano ku ta aportando na proyektonan  relashoná ku salu públiko i bienestar manera proyektonan pa stòp di huma, kome salu, prevenshon malesanan króniko, proyektonan pa hubentut, personanan ku defisiensia i pa nos grandinan. Un danki di kurason pa ta aportá na un komunidat saludabel.