Otro siman lo anunsiá  tokante benta di karchinan riba merkado lokal i benta di e karchinan pa merkado internashonal.  

Banda di e nòmbernan anunsiá anteriormente di Lionel Richie, George Benson, Luis Enrique, John Legend, La India, Sergio Mendes ku orguyo e organisashon por añadí tambe Simply Red na e impreshonante aliniashon di artista. Simply Red ta pará ya pa 25 aña kaba na tòp di músika Pòp ku hitnan manera:  “Something got me started”, “Holding back the years”, “Remembering the First time” i “It’s only Love”. Na novèmber 2010 e banda lo inisiá su gira di despedida.

Natalie Cole ya for di edat hóben ya e tabata presentá riba esenario ku su tata, e legendario Nat ‘King’ Cole. Komo kantante Pòp el a skor den añanan 80 hitnan manera entre otro Pink Cadillac  i Miss you like crazy. Su álbùm mihó bendí ta mira lus na aña 1991 ku Unforgettable...With Love. E álbùm ku partinan di repertorio stándart di su tata, pa simannan largu tabata komo number un na Merka i a keda koroná i premiá ku no ménos ku seis Grammy Award.

Raul Midón ta hòmber di hopi trayektoria i género. Espesialmente su tròmpèt di boka pa esei ta un karisia pa oido i pa bista. Midón ta varia sin esfuerso di añanan setenta lizu pa soul pa funk profundo i músika latino. 

For di Austin, Texas, ta bini e banda latino Grupo Fantasma. Ku diesun músiko, entre nan dos kitarista, kuater perkushonista i tres supladó, e banda ei tin un zonido masivo ku tambe por ta sutil i ku un refinashon sin igual.  Dos aña pasá nan a surpasá nan kulminá ora nan a trese un homenahe na James Brown na North Sea Jazz Festival na Hulanda.) E banda ta gradesí su popularidat entre otro na e hecho di a rebibá di e ritmo di cumbia. Nan penúltimo CD,  Sonidos Gold a haña un nominashon pa Grammy,

Mulato ta un inisiativa di JJ Rojer i Ralph Durgaram. Kitarista JJ Rojer anteriormente a traha ku  Paquito de Rivera i Wynton Marsalis ku su Lincoln Center Big Band.  Ralph Durgaram tabata drùmer di e banda rock The Wrong, el a traha komo produktor na Arcade, pero e tabata aktivo tambe den e esena di baile na Amsterdam.  Soul alternativo i músika Karibense ta determiná e ambiente di Mulato. E músika ta albergá influensianan di jazz, soul, lounge, músika bailable elektróniko, pero tambe folklor di Brasil i Antianan.

E pianista nasé  na Kòrsou Randal Corsen por ser mirá i konsiderá komo un embahador di músika antiano. Manera ningun otro e ta kapas di elaborá e ritmonan típiko di su isla, pero tambe di sobrá Antianan den su jazz. Huntu ku su invitado spesial Roy Hargrove esaki ta primintí di bira un konsierto spesial i memorabel.

Ku esaki e aktuashonnan ta yega un total di diesocho. Nuebe konsierto pa dia ku ta tuma lugá  na mes momento riba tres tarima diferente, e evento musikal di mas grandi di tur tempu den region di Karibe. Jorgen Raymann lo presentá komo ún di e Maestronan di Seremonia. Bo por haña un bista general di e  programa kompletu riba e página web: www.curacaonorthseajazz.com. Curacao North Sea Jazz festival ta inisiativa di Fundashon Bon Intenshon. E benefisionan nèto di e festival lo keda destiná pa un bon kousa!