Awor na Kòrsou Parlamentu di Antia ku su konstelashon aktual kier kore pasa un lei pura pura pa adelantá elekshon. 

Asta tin un komishon di 5 profesor instalá pa duna miembronan di Tweede Kamer un konseho si “uberhaupt” e kambio di Statüt lo por pasa ku un gobièrnu demishonario na Hulanda, i ku si e kambio aki lo tin mester di e 2/3 parti di Tweede Kamer pa por tin e valides nesesario mirando ku esaki no ta kualke lei. 

Pero aki na Antia promé ku tur esakinan tuma lugá, aparentemente kier pusha e lei pa adelanta elekshon sin sa si akaso lo tin un motibu pa adelantá esaki ainda, mirando e situashon na Hulanda. 

Nos a tuma nota tambe deklarashon di esnan enkargá ku organisá elekshon na Kòrsou ku a duna di konosé ku si akaso mes tin un lei pasa kaba den Staten di Antia pa kambio di ERNA, esaki no ta e pakiko pa kuminsá prepará niun elekshon adelantá, paso no tin un pakiko ainda pa esaki. 

Tur e hansha pa pasa e lei di Duncan mañan aki aparentemente ta simplemente basa riba interesnan personal di sierto polítikonan. 

E sugerensha ta pa atendé e lei aki na su debido tempu, anto esaki ta na momento ku tin klaridat riba e proseso estatal ku ta dependé aworakí di 100 miembro di e 150 miembronan di Tweede Kamer ku den temporada di elekshon na Hulanda lo tin ku buignan mes, i aprobá e leinan di konsenso ku partido PAR/PNP i FOL a negoshá pa Kòrsou bira un provinsia di Hulanda, kaminda nos hustisia i finansa lo wòrdu operá for di Den Haag.