Promé di yanüari 2009  akshonista di Refineria di Kòrsou, esta Teritorio Insular di Kòrsou, a sera un kontrato ku e direktor pa un periodo di dos aña,  prolongando su periodo komo direktor di e kompania. Akshonista a skohe pa prolongá su kontrato mirando e eksperiensha i prestashon di e direktor den e añanan anterior den kua e la funshoná komo direktor di Refineria di Kòrsou i  ku tabata na satisfakshon di e akshonista.

Konforme e kontrato di e direktor di Refineria di Kòrsou lo a evaluá e prestashon di e direktor pa ku su trabounan durante di aña 2009 a base di kriterionan i metanan ku a keda stipulá pe na kuminsamentu di 2009.

Ta trata aki solamente di un evaluashon di e metanan, pa ku aña 2009, i no un evaluashon general di e direktor. Su prestashon por lo general tabata bon, pa e motibu aki a ekstendé su kontrato ku dos aña.

Akshonista mes ainda no a trata e evaluashon di aña 2009 ku e la risibí de e komishon i tampoko e reakshon di e direktor riba e evaluashon aki. Akshonista promé ku trata esaki tin ku haña tambe punto di bista di hunta di komisario riba esaki. A base di esaki lo yega na un evaluashon final. Tin ku enfatisá ku e evaluashon i rekomendashon di e komishon aki no tin konsekuensha pa e kontrato ku e direktor.