Asosiashon di Músiko a keda kontentu ku e aserkamentu aki, ya ku di e forma ei e intentonan pa mehorá un mihó interkambio kultural entre Aruba i Kòrsou , ta ser benefisiá.

Ya kaba direktiva di AMAK a kombersá ku Promé Minister Mike Eman i tur kos ta indiká ku muy pronto lo eliminá tur e bareranan ku ta opstakulisá un bon interkambio entre Aruba i Kòrsou i ta bon pa durante di e periodo kaminda e diferente ehersisionan ta tuma lugá, pa formalisá sierto akuerdonan, no tin kosnan negativo ta tuma lugá.

Den kuadro di e komentarionan ku a bini den medionan di publisidat i ku a ser komentá pa presidente di AMAK, relashoná ku un supuesto fiesta kaminda Cache i Tsunami lo presentá sin kombinashon ku un grupo musikal lokal di Kòrsou, direktiva di AMAK a hasi su investigashonnan i a yega na e siguiente konklushon:

Ta bon pa na momentu ku e tipo di situashonnan asina aki presentá, nos tur averiguá e medaya di tur dos banda. Nos a komprondé ku originalmente Grupo ERA tabata den e kombinashon, pero pa motibu di kompromisonan inesperá na Ulanda, e organisadónan mester a bai buska un  grupo musikal pa remplasá ERA. Entre tantu esaki a keda reglá. Ta bon pa menshoná tambe aki nan ku próksimamente Grupo Cache i Gio Fuertisimo lo presentá na Aruba.

Nos ta kere firmemente ku a yega e momentu ku no mester eksistí ningun restrikshon entre gruponan Musikal di Aruba i Kòrsou presentá na un di e Islanan aki, ya ku esaki ta forma un base sólido pa estrechá lasonan kultural musikal.

Nos ta kere tambe ku den futuro e asuntu di gruponan musikal di yunan di Kòrsou biba na Ulanda pa bin aktua na Kòrsou, tambe lo bai tuma lugá den un forma mas akseptabel, es desir ku e dos gruponan musikal aki lo trata pa no bin aktua simultaniamente na Kòrsou. Esaki direktiva a komprondé di tantu di e dirigentenan di e dos agrupashonnan musikal Cache i Q-Sign.

Finalmente, direktiva di AMAK ke felisitá tur e músikonan ku a partisipá den Festival di Tumba 2010 i ta kontentu ku apesar di elekshonnan di Staten a difikultá promoshon di Festival di Tumba, e kantidat di públiko hasta a oumentá un tiki en komparashon ku e aña anterior.