E kousa di e redukshon den kantidat di bishitante por wòrdu atribuí na bahada fuerte den e merkado Venezolano di 76% ménos turista di estadia kompará ku e mesun temporada den 2008. Manera antisipá e merkado Venezolano a registrá un bahada grandi den e delaster 3 luna di 2009, debí na paro di buelonan charter for di Venezuela. Apesar ku e demanda pa bishitá Kòrsou tabata haltu no tabata posibel ehersé buelonan charter mas entre Venezuela i Kòrsou den 2009 manera tabata e kaso durante 2008. .

Mas enfoke riba otro merkadonan Sur Amerikano ta resultá den sifranan hopi positivo pa e merkado Brazilero, Colombiano i Surinameño. Kompará ku desèmber 2008, desèmber 2009 a registrá un oumento di respektivamente 130%, 35% i 51% turista di estadia for di merkado Brazilero, Colombiano i Surinameño. For di Brazil a keda registrá 891 turista di estadia, Colombia a registrá 839 turista di estadia i Sürnam 642 turista di estadia na desèmber 2009. Pero esakinan no ta sufisiente pa kontrarestá e bahada den e kantidat di turista for di e region Latino Amerikano.

Tráfiko di turista di estadia for di Europa a registrá un bahada di -4% den desèmber 2009 kompará ku desèmber 2008. E merkado Hulandes no a registrá un oumento manera ta kustumber. A keda registrá 10.326 turista den desèmber 2009, kompará  ku 10.372 turista registrá na desèmber 2008. Esaki a keda neutral ku 0% pa e merkado Hulandes den e periodo aki.

Turismo di estadia for di Nort Amérika a registrá un oumento di 16% den luna di desèmber. Pa e merkado Merikano a keda registrá un oumento di 19% kompará ku desèmber 2008 i e merkado Canades a registrá un oumento di 5% den e mesun periodo. Turismo for di Estádos Unídos ta keda frágil debí na e situashon ekonómiko pero reinisio di e di dos buelo di

American Airlines na novèmber 2009 despues di e paro na sèptèmber 2008 ta pone ku den futuro nos por risibí mas turista Merikano.

Merkado Karibense ta registrá un bahada den luna di desèmber 2009 di -8% kompará ku  desèmber 2008. E bahada aki ta debí na un bahada fuerte for di islanan di Jamaica (-39%) i Trinidad i Tobago (-25%) den desèmber 2009. E situashon den área di Karibe ta keda frágil miéntras e situashon ekonómiko na Nort Amérika no drecha.

Un total di 63.392 turista krusero a bishita Kòrsou na desèmber 2009 kual ta un bahada di 12% kompará ku e mesun periodo den 2008. Na desèmber 2008 72.356 turista krusero a bishita Kòrsou.

Sifranan Preliminar Yanüari te ku Desèmber 2009

Sifranan preliminar publiká pa CTB ta indiká ku den aña 2009 un total di 366.837 turista di estadia a bishita Kòrsou. Esaki ta kompará ku e mesun periodo na 2008 un bahada di -10%.

E kantidat di anochi ku e turistanan ta pasa na Kòrsou den aña 2009 a baha den su totalidat ku -9%, kompará ku e mesun periodo na 2008. E bahada den kantidat di anochi ku turistanan ta pasa na Kòrsou a keda registrá pa Nort Amérika(-22%), Sur Amérika(-20%), Karibe(-14%) i Europa (-1%). E bahada aki ta indiká ku kada un di e merkadonan menshoná ta trata na baha gastu di estadia dor di bai un vakashon ménos largu ku normal.

E tráfiko di turista di estadia for di Europa den su totalidat a registrá un subida di 9% di 136.747 turista na 2008 pa 148.450 na aña 2009.  E merkado Hulandes a registrá na aña 2009 un oumento di 11% den komparashon ku 2008. Otro merkadonan Europeo importante ku a krese den aña 2009 ta Alemania (+23%) i Bèlgika (+17%). Di otro banda algun otro merkado a desaroyá ménos positivo manera Scandinavia (-15%), Inglatera (-27%) i Italia (29%).

Den e periodo di yanüari te ku desèmber di 2009 e merkado di Nort Amérika a registrá un bahada di total -17% ku yegada di 42.055 turista di estadia kompará ku 50.924 turista den e mesun periodo den 2008.

Tráfiko di turista di estadia for di e region di Karibe a registrá un bahada di -12% den aña 2009. E bahada di kantidat di turista Karibense aki ta debí na un bahada di turista for di Jamaica (-26%), Trinidad & Tobago (-19%) i Aruba(-2%).

Den su totalidat e merkado Venezolano a registrá un bahada di -30% di 148.890 turista pa 104.962 den aña 2009 den komparashon ku aña 2008. Ta antisipá ku e kantidat di turista for di Venezuela lo sigui baha den 2010 pa motibu di devaluashon di bolívar. E merkado Brazilero ta registrá un oumento di 5% den aña 2009. Otro merkadonan ku a registrá un oumento den 2009 ta Sürnam (46%) i Colombia (15%).

Un total di 423.088 turista krusero a bishita Kòrsou den aña 2009 kual ta un oumento di 20% kompará ku aña 2008.

Mayoria isla den Karibe a sinti efektonan di e situashon ekonómiko finansiero mundial durante henter 2009. Kòrsou tambe a eksperensiá e konsekuensianan di e situashon ekonómiko mundial den sierto merkadonan pero e situashon den e merkado Venezolano a resultá den un bahada fuerte ku tin un impakto enorme riba yegadanan turístiko den e último 2 luna di 2009.

Klik riba e link pa por  mira e estadistikanan