Den Kaya Azurit polis a bin topa e víktima, e hòmber R.A.J., nasé na Kòrsou, di 42 aña di edat, sintá den su outo ku vários perforashon di bala na altura di su rudia drechi.

For di un investigashon preliminar a resultá ku e víktima tabata kondusiendo un vehíkulo den kompania di un dama, ora ku e la nota ku un vehíkulo tabata persiguí nan.  Na dado momentu ora e la para den Cabo Verdeweg, un hòmber ku tabata den e outo ku tabata persiguí nan, a aserka nan i pa un motibu te ainda deskonosí a los vários bala riba e víktima J. ku a alkans’é na altura di su rudia drechi. E dama ku tabata huntu ku J. den outo, mesora despues di e suseso a stür e outo i a bai para den Kaya Azurit kaminda nan a avisá polis. Ambulans a transportá e víktima ku urgensia pa poliklínika di hospital St. Elisabeth.

Polis no a hasi ningun detenshon ainda i e investigashon ta kontinuá.