| Diputado Humphrey Davelaar i USONA a firma proyekto Fail Elektroniko pa GGD |
|
|
|
| Monday, 08 March 2010 - 19:37 | |
Tarea primordial di Servisio di Salú Públiko (GGD) ta atendé ku salú di poblashon di Kòrsou sin distinshon di edat, konvikshon religioso, seguro, entrada o klase soshal ekonómiko. GGD tin diferente manera i departamentu pa kumpli ku su tarea pa vigilá i promové salú públiko di Kòrsou. Un di e departamentunan di GGD ta Departamentu Salú Hubenil. Departamentu Salú Hubenil (D.S.H.) ta enkargá ku kuido preventivo di salú pa muchanan entre 0 pa 19 aña. E kuido ta enserá vigilansha di salú, kresementu i desaroyo, bakunashon, kursonan i sosten na mayor òf otro profeshonal ku ta traha ku mucha. E kuido ta keda duná na ofisinanan di konsulta di beibi i mucha chikí i skolnan.E profeshonalnan ku ta traha den e kuido preventivo pa beibi – hóben ta médiko, enfermera i/o pedagogo. For di ora un mayor inskribí su beibi na un di e ofisinanan di konsulta e instansha ku ta duna kuido ta pa lei obligá pa establesé un fail (“dossier”) pa e yu. GGD por medio di su departamentu D.S.H. ta pone e fail aki disponibel na tur instansha ku ta duna kuido preventivo di salú pa mucha na Kòrsou. E fail aki ta propiedat di gobièrnu Insular di Kòrsou. E kuido ku e yu mester risibí ta keda registrá segun e struktura di e fail. Di e forma aki e kontenido di kuido i registrashon ta keda standardisá i uniformá. Kada kontakto ku e yu ta keda registrá den e fail aki, p.e dato di bakunashon, resultado di e desaroyo anatómiko -manera peso i largura -, e desaroyo metódiko i esun soshal emoshonal. A base di e registrashon aki por evaluá e kresementu i desaroyo di kada mucha individual na e momentu di konsulta pero tambe den transkurso di tempu.Di e forma aki e profeshonal por siñalá hopi tempran si tin problema den salú, kresementu i desaroyo di e mucha pa asina referí e yu i/o hóben pa kuido speshalisá. D.S.H. tin un archivo ku ta data fo’i muchanan nasé na 1963 ku a risibí kuido preventivo di salú na GGD, Mama di Bon Konseho/Wit Gele Kruis i despues tambe Neutrale Wijkverpleging i Isla. Aparte di vigilá salú, kresementu i desaroyo di kada mucha individual tambe D.S.H. ta vigilá esun di e poblashon di 0 – 19 aña. Pa esaki e profeshonal speshalisá di D.S.H. –hopi biaha den kooperashon ku e Departamentu Epidemiológiko i Investigashon- ta analisá dato di diferente aspekto di salú pa asina siñalá, kuantifiká i pronostiká problema di salú den nos komunidat manera sobrepeso, (mal)nutrishon/moveshon, problema soshal-emoshonal i problema di salú a base di abilidat pedagógiko di e mayornan.Na 2008 D.S.H di G.G.D.a entregá un petishon den kuadro di Inisiativa Soshal Ekonómiko (SEI) pa finansiamentu di un proyekto pa introdusí un fail elektróniko. Despues di aprobashon e proyekto di fail elektróniko a keda firmá dia 5 di mart último pa sr. R. Doran di USONA i Diputado sr. Humphrey Davelaar, Diputado di Salú Públiko i medio Ambiente. |
