Djasabra 6 di mart último den oranan di mainta, Gobièrnu di Kòrsou a duna rekonosementu na e fundadó di e klup di shofùrnan di bus Sr. Evaristo Petrus. Durante di un seremonia, kaminda famia, amigunan i otro personanan prominente den nos komunidat tabata presente, Gezaghebber Interino sr. Leonard Coffie, Diputado di Enseñansa, Kultura i Deporte sra. Marilyn Alcalá-Wallé huntu ku e representante di Sindikatonan di Transporte Uni, sr. Andres Everitz i respektivo famianan, a hasi desvelo di e bòrchi ku ta nèt na komienso di e parada di bùs na Punda.

Va Petrus, kende tabata shofùr di bùs pa mas ku 25 aña, a hiba un lucha inkansabel na benefisio di e klase trahadó komo dirigente i militante den Sindikalismo i Koperativismo. Komo dirigente di e klase trahadó di transporte e la sa di manehá e klup di shofùrnan di bus A.C.A.C.U., demostrando asina su solidaridat ku e gremio aki ku e mes tabata pertenesé na dje. Va tabata entre esnan ku den añanan 60 a disidí ku nan tambe kier a lanta nan mes Credit Union i a hasi esei netamente riba un djadumingu Dia di Mama. Esei a resultá tambe den nòmber di Credit Union Motherday den kua Va tabata e tesorero.

Awendia Va no tei mas huntu ku nos, sinembargo e kambionan positivo i kada un di e benefisionan den e sektor aki ku si a keda atras, ta hasi ku no únikamente shofùrnan di bus sino tambe pasaheronan por sinti nan kómodo

den e fasilidatnan di e medionan di transporte aktual. Segun diputado Alcalá-Wallé a remarká, aki ta trata di un hòmber ku realmente a duna krédito na su nòmber, esta Petrus, ku en realidat ta nifiká baranka.

Despues di palabranan emoshonante di gradisimentu di señora Monica Petrus-Angela, esposa di sr. Va Petrus, mgr. Amado Römer a duna honor na Todopoderoso pa medio di un evokashon.

Riba e potrèt por mira e mandatarionan i e famianan konserní durante di e seremonia di e desvelo di e bòrchi na nòmber di sr. Evaristo “Va” Petrus.