Komo miembro di Nashonnan Uni, paisnan afiliá ta mand’é reportahe di nan maneho dirigí riba desaroyo di e hende muhé pa asina hasi posibel pa monitoria avansenan mundial riba emansipashon general di e hende muhé.

Felisitando nos hende muhénan riba nan dia, Partido MAN ta proklamá su sosten total na e tema aki.  

E lei di maternidat ku frakshon di MAN den parlamento a presentá i Parlamentu a aprobá unánimamente por ser konsiderá un aporte importante na desaroyo di e hende muhé. E lei di maternidat ta duna sosten en general na e hende muhé komo trahadó i ta pone énfasis riba rèspèt pa salu di e hende muhé komo  mama i e yu.  

Por ehèmpel e lei ta prohibí enfátikamente deskriminashon den kualke forma i/òf  retiro pa motibu di e hende muhé su embaraso, e ta protehá salu di e trahadó hende muhé embarasá i e yu den su barika, ampliando fèrlòf di maternidat te ku 14 siman, brindando e mama oportunidat pa ta mas tantu tempu dediká na su yu den e promé simannan, e lei ta prohibí trabou di anochi i trabou trahando largu riba pia, ku indudablemente ta afektá e hende muhé na estado.  

E lei ademas ta krea kondishonnan mas faborabel pa e trahadó mama por ehersé su tarea maternal den e temporada ku e ta alimentá  e yu ku lechi di pechu, dor di introdusí pousanan pagá pa duna yu lechi òf “kolf”, den un ambiente adekuá. Den sierto kaso e lei di maternidat ta brinda derechi riba fèrlòf pa e trahadó hende hòmber ku tin un relashon di mayor ku e yu resien nasí, pa asina sigurá ku e yu den su promé lunanan por gosa di un kuido mas adekuá i e mayor no mester roga doño di trabou pa kumpli ku su derechonan.  
E echo ku gabinete de Jongh-Elhage ainda no a publiká e lei importante pa asina e drenta na vigor i trese bienestar i progreso pa e hende muhé, sin mas ta un omishon altamente lamentabel.  

Frakshon di MAN den e kuadro aki ya kaba a manda un karta ku preguntanan al respekto i a hasi un apelashon fuerte na gabinete de Jongh-Elhage pa duna klaridat promé ku dia 8 de mart. Frakshon di MAN no a risibí ningun kontesta te ku djabièrnè 5 di mart último i p’esei lo pidi un reunion públiko pa gobièrnu bin duna kuenta i rason den parlamento pa e tardansa den publikashon di e lei di maternidat.  

MAN tur dia atrobe ta risibí yamadanan di muhénan na estado ku ta ansioso pa sa ku nan por apelá na e lei aki i tin esta muhénan ku miéntras tantu ya kaba a duna parto i pa motibu ku no a publiká e lei, ta pèrdè e chèns di hasi uso di e benefishinan di e lei di maternidat.

Pa MAN esaki ta algu inaseptabel. 

Desaroyonan preokupante ku ta frena progreso  di e hende muhé

Sin ke deskartá  ku nos pais a hasi progresonan grandi den nos lucha pa derechonan i oportunidatnan igual pa e hende muhé, tòg nos ta mira  desaroyonan preokupante bou di e grupo di hende muhé, ku sin mas ta strob’é  progresá i realisá un mihó bida pa su mes i pa su famia.  

No mas ku 2 luna pasa a sali na kla ku e kantidat i grado di kasonan di violensha doméstiko, den kual e hende muhé ta e víktima mayor, ta alarmante. Bou di nos hubentut tin un desaroyo preokupante di embaraso hubenil, ku ta frena oportunidat di un grupo grandi di nos generashon femenino di futuro.  

Falta di vishon i un maneho dirigí riba prevenshon di kriminalidat i violensha bou di nos hubentut, famianan en general i e mama en partikular, tur dia ta biba bou di un intrankilidat pa un desaroyo i futuro sano di su yunan. Problemanan den enseñansa di nos pais kompaña pa un porsentahe di no mas ku 40 % di dropout bou di nos hóbennan ta sklama pa solushon.  

E grado di pobresa den nos komunidat, ta afektá partikularmente mayoria di mamanan soltero, ku komo e hende muhé na kabes di e famia, tur dia tin ku hiba un lucha enorme pa logra pone pan riba mesa i sòru pa tin un dak riba su kabes.  
 
P'esei MAN ta di opinion ku nos komo pais i sigur den e pais Kòrsou nobo, mester tin aun mas atenshon i maneho  dirigí pa logra progreso sosial, ekonómiko i emansipatorio pa nos hende muhénan i nan famia.  

MAN ta kontinuá  su lucha pa progreso di un i tur

MAN den e kuadro aki ta keda pone énfasis riba e nesesidat pa introdusí un Konseho pa Desaroyo Sosial, ku ta regla e nivel di bida di nos poblashon i ta señalá kaminda mester di korekshon.