Ta un echo ku tin un kantidat di hóben na Kòrsou ku no tin kòmpiuter na kas i ménos na nan disposishon;

Tambe ta un echo ku awendia skolnan ta rekerí tareanan ku mester keda traha den kòmpiuter i informashonnan ku tin di baha for di Internet; 

Teniendo na kuenta e puntonan ariba menshoná Fundashon Gerrit Schotte ta lansa awe dia 22 di Febrüari 2010 e proyekto pa komunidat ku ta konsistí di e fasilidatnan di kòmpiuter fiho den e sede na hanchi snoa Punda i tambe un edukador profeshonal ku mas di 35 aña di eksperiensha ku lo yuda asistí den guia di tarea. 

Tin un nesesidat grandi na guia di tarea anto esaki no ta pasobra e hóben tin un límite di inteligensia. Tin un aspekto masha grandi di e pakiko un hóben ta keda atras den su avanse di estudio, por ehèmpel: 

• Problema di konsentrashon
• Problemanan na kas
• Desviashon spesífiko manera dyslexie,dyscalculie
• Retraso di idioma
• No por komprondé e lès bon dor di falta di un bon manera di splika di parti e dosente
• Miedo di faya
• Angustia pa ku eksamen o prufwèrk

Nos lo tin un orario di 2 pm - 7 pm di djaluna pa djabièrnè, akinan lo tin 2 yùfrou ku tambe ta den nan proseso di edukashon avansá ku den nan tempu liber ta traha i aportá na e proyekto soshal aki i koordiná e parti di akseso na kòmpiuter i Internet. 

Anto tambe nos lo tin 1 edukador profeshonal ku lo asistí hóbennan for di klas 3 di skol básiko te ku di 2 klas di enseñansa avansá.  

E siman benidero aki nos lo brinda e oportunidat na esnan ménos privilegiá den nos komunidat pa tin e derecho di inskribí pa nan yu por haña e guia di tarea aki di parti Fundashon Gerrit Schotte. 

Fundashon Gerrit Schotte su úniko eksigensha ta ku esunnan ku ta inskribí mester demostrá ku nan tin "ònderstant" òf un salario hopi abou pa asina por yega na remarke, i tambe un identifikashon di e yu ku ta wòrdu inskribí (geboorteakte). 

Di e forma aki Fundashon Gerrit Schotte ta duna su kontribushon na desaroyo positivo di nos komunidat i enpartikular di nos hóbennan.