E tentashonnan durante karnaval

Den e temporada di karnaval, e aktitut di hubentut ta ser influensia na múltiple manera, pa nan disfrutá na un manera deskontrolá. Bou di influensia di alkohòl, droga i euforia, nan ta tene relashon seksual ku un òf mas partner, ku òf sin protekshon. E norma i balornan dje hóben no ta konta den e temporada aki. Si e hóben ta sukumbí pa preshon di grupo ku e ta den, pronto e ta bira víktima di un òf mas otro hóben òf adulto ku kier satisfasé nan mes a kosto di dje. 

Skohe pa ta un ganadó

Pa prepará e hóben pa Karnaval, Fundashon ATM ta bai parti flyers promé ku e marcha sali, pa konsientisá e hóben dje peligernan ku e ta hinka su bida aden. Pues hóbennan ta bai spièrta otro hóbennan pa apstené di un aktitut di pèrdèdó (‘loser’). Esaki ta un aktitut ku ta laga nan yora malai despues di karnaval. En bèrdat kada persona - e hóben tambe - por skohe ki komportashon i/o aktitut e ta bai karnaval kuné. Meskos ku e ta skohe kiko e ta bisti mainta, kiko e ta kome, kiko e ta bebe, meskos e ta skohe kon e ta komportá den karnaval. E eskoho ku e hóben hasi lo tin konsekuensha p’e; sea bon òf malu. 

Balor propio

E hóben mester bira konsiente di su balor propio i no bende su mes pa kos òf pa un tiki atenshon pasahero. E mester tuma e aktitut di un ganadó, un ku ta para pa eskoho di bida salú; un ku sa ku e tin derechi di bisa nò i skohe pa no djòin e grupo ku ta preshonando’é pa hasi loke no ta korekto.

Pa bo por kana ku bo kara na laira, pa bo haña e rèspèt ku bo meresé, pa bo sintibo bon ku bo mes, pa bo mustra ku bo ta balorá bo mes i no ta permití otronan uzabo sin mas.  

ABC

Na Uganda (Afrika) e konsepto ABC a logra baha e kantidat di personanan infektá ku HIV. Einan ABC ta para pa Apstinence, Be faithful (one partner), Condom. Aki na Kòrsou Fundashon ATM ta usa ABC asina’ki: Apstain ‘Till Marriage (ATM), Be faithful (sèks ku bo kasa so), Christ (Dios). Pasobra Fundashon ATM ta konvensí ku den Kristu nos tin fortalesa. E Fundashon tin sigur ku e último konsepto aki lo redusí hopi problema emoshonal, sosial i tambe e gastunan ku gobièrnu tin awor aki ku salubridat públiko.  

Mensahe pa hóbennan

Fundashon ATM su mensahe pa hóbennan ta lo siguiente. Hóben, e úniko manera pa evitá malesa transmití seksualmente, i pa bira mama òf tata muchu tempran ta dor di no tene relashon seksual. E tentashon tei, pero bo tin dominio propio, tòg??1 Tesalonisensenan 4:4 ta bisa: “Boso no mester laga pashon i mal deseo dominá boso manera ta pasa ku hende ku no konosé Dios.” 

Awèl hóben, bo mester respetá bo mes pa otronan respetá bo. Reflehá den bo vestuario i komportashon ku bo kurpa físiko no ta tur kos, ku bo ta mas ku un kurpa so. Bo tin un mente ku por pensa, bo tin un kurason ku ta sinti i un spiritu ku ta halsa Dios dor di hasi loke ta korekto. Pues hóben, skohe pa ta un ganadó!  

Mensahe pa mayornan

Fundashon ATM tin un mensahe pa mayornan tambe. Nos hóbennan for di chikitu ta pidiendo atenshon i esun di mas importante: amor i rèspèt di nan mama i tata. Mucha mester sa ku tin regla, i mayor mester ta konsekuente ku nan yu for di chikí. Sí ta sí, nò ta nò! Nos mundu moderno no tin tempu mas pa eduká yu ku disiplina i amor. I awor nos ta kargando ku e konsekuensianan. P’esei mayornan, invertí tempu balioso den boso yunan. Nan ta boso responsabilidat Duna nan e amor puru ku ta solamente un mama i tata  por duna un yu. Ku disiplina boso lo forma hóbennan desente. Ban sigui e konsehonan di nos Tata Selestial i nos lo mira un generashon nobo lanta ku nos lo ta orguyoso di dje.