Resientemente Gobièrnu di Kòrsou a modifiká e lei ku ta reglá impuesto riba kamber.  E kambio, ku a drenta na vigor ta konta tambe pa personanan partikular ku ta brindá hospedahe na turistanan kontra pago. Otro kambio den lei ta stipulá ku tur e loke keda generá pa medio di e impuesto aki lo keda usa direktamente pa desaroyá nos turismo  dor di por ehèmpel mehorá nos produkto turístiko òf promové turismo pa nos isla.   

Turismo kada aña ta kontribuí ku Nafl. 176 mion na impuesto den kaha di gobièrnu. Un kantidat di 10.200 persona ta traha den turismo.  Turismo ta kontribuí ku Nafl. 588 mion na divisa. E kresementu proyektá di nos turismo ta brinda perspektivanan interesante.  Sinembargo pa nos krese nos mester oumentá e demanda pa bishitá nos isla, oumentá nos invershon den merkadeo i “airlift”, ekspandé nos kapasidat laboral i mehorá nos infrastruktura pa por akapará e kresementu.  Pa logra esaki Curaçao Tourist Board (CTB) ta den proseso pa fórmula un vishon di nos turismo na 2020.  Den e kuadro aki ta tumando vários inisiativa pa por realisá e vishon.  E inisiativanan ta kubri entre otro desaroyo di mas buelo pa nos isla, mehorashon i ekspanshon di nos produkto turístiko, desaroyo di turismo krusero, promoshon di Kòrsou komo destinashon, desaroyo di nos rekurso humano i mehorashon di nos infrastruktura.  Por último nos lo mester garantisá un fluho di fondo duradero pa por realisá e inisiativanan aki.  E modifikashon den e lei mester ta un empuhe supstansial na garantisá un fluho duradero di fondo. 

E Impuesto di Huéspet ta konta en prinsipio pa personanan ku ta pone un espasio pa hospedá  na disposishon di un hende ku no ta residenshá/biba na Kòrsou.  No ta hasi diferensha ku ta trata di un persona ku regularmente òf de bes enkuando ta pone e espasio na  disposishon di huéspetnan: tur hende ku ta hür un lugá ku un hende ku no ta residenshá/biba na Kòrsou mester paga e impuesto.  E asina yama “all-inclusive” ta paga 7% riba 60% di e preis di e “all-inclusive.”  Ta bon pa enfatisá ku no mester paga mas e 5% di ‘omzetbelasting’ riba hür di kamber. E impuesto aki no ta konta pa personanan ku tin un kas na Kòrsou pero ku  ta biba den eksterior.  E impuesto ta konta sí ora nan pone e kas na disposishon di un otro huéspet kontra pago. 

CTB ta bira e instansha ku ta enkargá ku implementashon i kordinashon di e lei.  CTB kada aña ta esun ku ta suministrá e formulario pa deklarashon di impuesto. Pagadónan di impuesto ku no a risibí nan formulario di deklarashon di impuesto mester hasi un petishon pa esaki òf download esaki for di e website di CTB esta www.ctb.an. E pagadó di impuesto ta responsabel pa yena un formulario tur fin di luna i paga e suma ku e debe dentro di 15 dia despues di fin di luna.  Pago di impuesto mester tuma lugá serka Eilandsontvanger di Kòrsou.

Ta bon suprayá  ku tin diferente klóusula di but den kaso ku un persona keda sin kumpli ku e lei. 

Kalkulo ta indiká  ku lo por generá un montante di Nafl. 10 mion florin anualmente ku e impuesto aki.  E fondo aki ta keda invertí direktamente den desaroyo di nos turismo.  Di e forma aki ta garantisá un kresementu turístiko sólido ku lo ta na bienestar di henter nos komunidat.   

Pa mas informashon por bishita www.ctb.an òf yama CTB na 434- 8200.