Servisio pa Komunikashon i Informashon ta partisipá ku resientemente Diputado Mike Willem di Finansa a firma un akuerdo ku USONA, pa sèn di desaroyo di Ulanda pa un proyekto ku e nòmber Mehoransa di Maneho Finansiero (Verbetering Financieel Beheer). E proyekto ta kai bou di e programa di kolaborashon IVB di Teritorio Insular di Kòrsou. Klik read more pa mas informashon...

E proyekto ta enserá un montante di NAf 4,483.025 ku den dos aña di tempu mester mehorá nos maneho finansiero riba e siguiente terenonan:

•  
  • Fortifikashon di e manera di informá i reportá asuntunan finansiero;
  • Fortifikashon di konfiabilidat di atministrashon finansiero, ku e meta pa e informashon finansiero bai mas lihé, mas kompletu i na tempu;
  • Fortifikashon di organisashon atministrativo i kòntròl riba atministrashon finansiero;
  • Fortifikashon di konosementu i abilidat di empleadonan públiko i mandatarionan riba tereno di maneho finansiero;
  • Fortifikashon di konosementu i e grado di kumpli ku Ordenashon di Supsidiá nobo dor di instanshanan supsidiá.
  • Fortifikashon di maneho di medionan integrá.
  • Fortifikashon di organisashon di funshon finansiero.

Tin dos motibu pa bini ku e proyekto akí Unu ta un investigashon den aña 2006 na e maneho finansiero di e islanan di Antia ku a resultá den e Plan di Implementashon Maneho Finansiero. Den e Plan aki a pone e kondishonnan di fortifikashon i adaptashon, ku mester resultá den un sistema kontrolá i balansa. E otro motibu ta e kombenionan entre partnernan den Reino tokante e struktura nobo, ku ta enserá maneho finansiero tambe. Ta di sumo importansia pa nos sistema finansiero yega na un nivel balansa promé ku nos yega Pais Kòrsou.

Ya kaba Gobièrnu di Kòrsou a kuminsá  ku sierto aktividat for di e Plan di Implementashon Maneho Finansiero. Na final di e proyekto nos maneho finansiero lo ta unu ku un base madurá i fuerte, konfiabel i sólido kaminda efektividat di nos maneho finansiero lo ta hopi mas grandi ku ta e kaso awor akí.