E finansiamentu aki ta pa un proyekto pa pone kapasidat èkstra disponibel den e aparato gubernamental den kuadro di trabounan pa logra Pais Kòrsou. E proyekto tin un durashon di 18 luna i ta kosta en total 3,2 mion florin.

Meta di Gobièrnu Insular ta pa realisá Pais Kòrsou 10.10.2010. Den e kuadro aki Konseho Insular a disidí e aña aki pa yena algun vakatura i tambe atraé èkstra personal i òf ekspertonan riba un base temporal pa kontribuí na:

1. mantenshon di e nivel di suministro eksistente na públiko

2. reforsá i optimalisá toma di desishon dor di planiamentu di konseho di maneho, proposishonnan nobo pa maneho

3.  sosten pa e esun ku ta guia e ehekushon i atministrashon di proyektonan i trayektonan

E intenshon ta pa promé  ku fin di febrüari 2010 tin un análisis di e nesesidat spesífiko ku e diferente servisionan tin. Ademas lo mester bin alternativanan ku ta duna sufisiente alivio te na momentu ku nos yega na e asina yamá “Nieuwe Bestuurlijke Organisatie” di Pais Kòrsou.

Gobièrnu ta garantisá  tur trahadó den e aparato gubernamental ku nan posishon hurídiko lo ta sigurá.

Tambe a firma un proyekto chikitu pa sosten èkstra pa e trayekto pa guia e trabounan ku ta tumando lugá pa yuda konstruí i kordiná ministerionan nobo. Ku e proyekto aki Gobièrnu ta sòru pa tur trabounan riba e dos nivelnan gubernamental por flui drenta otro fásilmente.