Un problema a surgi pa motibu di falta di koriente den e klas kaminda a pone e urna. E mashin a kuminsá funshoná riba bateria miéntras tantu a solushoná e problema.

Despues di a reaktivá un mashin na Bonam ku no tabata traha, esaki a kuminsá funshoná bon atrobe. Esei si a okashoná ku e urna ei a habri mas lat ku e orario stipulá.

Na un urna na Punda téknikonan mester a bai remplasá un prenter.

Na un otro urna, sonidonan duru di trabou di konstrukshon tabata stroba e urna di funshoná bon ya ku no por a tende loke ta nesesario. Esaki tambe a keda solushoná.

Na un urna na Mahaai ta tin un mashin kaminda a instalá e tablanan robes loke a okashoná ku e votonan tabata sali robes. Ora presidente di urna a ripará esei, a deklará e votonan inválido. Miéntras e ekspertonan a guia e urna ei telefónikamente pa drecha e fayo i a laga e personanan konserní vota di nobo.

For di promé di 6’or di mainta a kuminsá parti e mashinnan di Smartmatic i otro rekisitonan nesesario pa e presidentenan di e urnanan. Bou di guia di polis i miembronan di VKC e presidentenan a bai nan lokalidat pa instalá e urna.

A konstatá ku basta hende a bai hasi uso kaba di nan derechi di vota den e orarionan trempan di mainta, loke tradishonalmente sa ta e kaso na Kòrsou. Normal sa bira un tiki mas trankil durante dia pa despues na final di dia semper un grupo grandi ta bai vota.

Konseho Supremo Elektoral ta urgí tur hende ku no a bai vota ainda pa bai hasi uso di nan derechi di vota awe. Ta pidi tur doño di trabou pa kòrda duna nan personal oportunidat di bai vota durante 4 ora konsekutivo durante e oranan ku e urnanan ta keda habri. E oportunidat pa bai vota tei te 7’or awe nochi.