Speshalmente e entrevistanan ku e hóbennan di FOL, Almier Godett, Jefferdion Polonius i Christine Newton tabata interesante. Hans Els di e Lista Kombiná tambe a wòrdu entrevistá. Tabatin un kantidat di hóben presente ku a haña e chèns pa hasi pregunta ku a resultá hasta den un debate chikitu y espontaneo entre Godett i Els. 

Meta di e programa ta pa motivá hóbennan pa vota konsiente. Pa alkansá e meta aki, lo duna informashon den e programa na un manera ku ta apelá na hóbennan su interés.

Hóbennan por hasi tur klase di pregunta. E hóben presente na patio di CUROM ayera tabatin oportunidat durante di e transmishon pa hasi diferente pregunta na e polítikonan ku tambe tabata presente. Preguntanan manera kiko ta nan koló faborito i si nan mes tambe tin ambishon pa bira Minister President.  

Awor ku kampañanan polítiko a kuminsa, mayoría hóben (entre 18-35 aña di edad), ku ta forma 26% di tur votante, ta den e proseso pa hasi un eskoho. Un Voto, Bo Futuro ta é programa pa yuda e hoben den e proseso aki i alabes ta e plataforma ideal pa polítikonan bishitá. Un Voto, Bo Futuro ta un produkshon di 88Rockorsou i Young People and Politics i ta wòrdu transmití tur djarason entre 6or pa 7or na 88Rockorsou(88.3FM)