Dia 15 di sèptèmber último a aprobá pa instalá un komishon pa referèndem ku mester a traha riba e kriterionan pa organisá un referèndem.

Entre tantu e komishon a entregá konsehonan i awor lo sigui ku e siguiente fase ku ta e preparashon pa tene e referèndem mes.

Den kuadro di esaki pa optené mas tantu informashon posibel, a disidí pa trese un eksperto riba Struktura Estatal Boneiru. Ta trata aki di dr. Carlyle Corbin.

Komo tal djasabra awor e eksperto aki lo ta na Boneiru pa asina interkambiá riba e konseho di e komishon di referèndem.

Dr. Corbin lo papia ku Kolegio Ehekutivo, Konseho Insular i miembronan den e asina yamá ‘klankbord’.

Un di e tópikonan sigur lo ta di asosashon liber i integrashon.

Despues di esaki pa dia 30 di novèmber te ku dia 5 di desèmber 2 representante di Nashonnan Uni lo ta na Boneiru pa asina papia ku tur gremio i pa despues duna nan konseho pa e referèndem tin ku bini.

Diputado sra. drs. Marugia Janga ta haña ku e preguntanan pa referèndem mester ta ophetivo i bon fórmula pa despues por skohe un fecha.

Ora ku kaba skohe e fecha i ku e representantenan di Nashonnan Uni a bai di akuerdo ku e kontenido, lo bini un lei pa e referèndem ku mester bai Konseho Insular pa aprobashon. Despues di esaki lo mester instituí otro komishon di referèndem ku mester bai informá pueblo di e preguntanan.

Pa dia di e referèndem mes e representantenan di Nashonnan Uni lo ta bek pa monitor i kontrolá pa e referèndem ta bálido.

Tambe diputado Janga a splika ku e dos representantenan di Nashonnan Uní lo papia ku e klankbord.

Den e klankbord aki tin bintidos organisashon ku ta representá pueblo boneriano.

Pa loke ta e situashon aktual e diputado a splika ku na 2004 pueblo a skohe pa laso direkto i esaki a ser splika den e forma ku Boneiru mes lo hasi mas tantu ku ta posibel i e loke ku e mes no por lo hasié huntu ku Hulanda. Sinembargo gobièrnu anterior a kombertí laso direkto den integrashon, siendo ku esaki no a ser puntra den e referèndem na 2004.

E biaha aki lo bini ku preguntanan dirigí i komprendibel pa huntu ku esaki laga e komishon di referèndem duna e informashonnan nesesario den bario pa pueblo.

Mas aleu e diputado a splika ku e proseso aki ta lòs for di elekshon i ku  pueblo mester haña e oportunidat pa informá su mes  los for di polítika.

Un referèndem mester ta ophetivo i e no por ta polítiko, ta trata aki di futuro di Boneiru i esaki ta importante di akuerdo ku e diputado.

Diputado sra. Janga di su banda ta sumamente kontentu ku lo bai tene un referèndem p’asina pueblo por haña klaridat i pa despues e por skohe mas mihó kiko e ke.

Gobièrnu mester respetá e desishon di pueblo i ehekutá esaki manera a ser disidí enbes di primintí un kos pa despues kohe un otro rumbo.

Tambe ta asina ku Hulanda mester respetá e desishon di pueblo i si akaso pueblo skohe pa algu otro, nan mester sinta na mesa i kuminsá ku e negosiashonnan di nobo.

Komo tal e ta insistí  ku den e referèndem no mester skohe pa partido pero pa Boneiru!