SKAL i Sòldachi Tours (sra. Maria Koeks) ta risibí tur amante i outor di poesia i storia na Altamira Undjo pa pasa un anochi literario ku ta start ku un kaminata for di Rincon pa Altamira Undjo.

E anochi ta start for di 18:00 or ku un kaminata ku informashon di e sitionan ku ta kana pasa, pa esnan bon riba pai, for di Plasa Commerce bai Altamira Undjo. Pa 19:00 or ta sigui ku e parti literario na e sitio di Altamira. Pa e personanan ku no ta konosí ku e ruta i sitio: sigui e kaminda direkshon di BOPEC te ora yega na e bòrchi di Altamira Undjo na man drechi. Aki ta sigui e kaminda di tera bai pariba te na final.

Pa e refresku i pasaboka ta pidi pa trese algu pa kompartí ku otro (estilo beilèg). Bin tambe ku un stul di klap si ta posibel i un flèshlait.

Den e parti literario lo tin espasio pa outornan di poesia i storia, deklamadó di poesia i kontadó di storia lokal haña oportunidat pa presentá obra i informashon na e grupo presente ku e meta pa interkambiá di idea i krea estímulo pa sigui skirbi mas obra. Bin tira loke bo tin den grupo den un ambiente literario i den un panorama eksepshonal ku luna yen! 
 

Lugá: Altamira Undjo despues di kaminata Rincon-Altamira

Fecha: djabièrnè 4 di desèmber

Nesesidat: Pia duru pa kaminata i despues poesia/storia memorisá/riba papel na papiamentu, hulandes, ingles, spañó.

*Poesia/storia skirbí pa dokumentashon’.

Tema: Pas i Mi regalu òf algu liber

Programa: Kaminata for Plasa Commerce pa Altamira 18:00 or siguí pa programa literario for di 19:00 or