E Komishon organisadó  kual ta konsistí di e Komité Olímpiko di Uruguay (COU) i Ministerio di Turismo i Deporte (MINTUR) ta organisá Weganan di Playa ku lo tuma lugá entre 3-13 di desèmber na Montevideo i Punta del Este,  (Uruguay).

Fuera di Antia tin un total di 14 pais ku ta wòrdu representá riba e evento aki. Komité Olímpiko di Antia (NAOC) a prepará un delegashon di 9 persona, di 2 diferente deporte kual ta Vòlibòl di Playa i Vela.

E atletanan di Vòlibòl di Playa ta Homi Cathalina, Omar Kalmez, Aegidio Juliana i Giandro Tokaay i ta wòrdu akompaña pa Coach/delegado Gerald Rosina ku ta representá  e federashon di Vòlibòl di Antia.

Vela tin solamente Dennis van den Berg ku lo wòrdu akompaña pa Coach Leonardo Jenkins. 

E delegashon di Vòlibòl di Playa lo sali huntu ku e masahista Richenel Eleonora dia 30 di novèmber pa Montevideo. E kompetensia di Vòlibòl di Playa lo tuma lugá na Montevideo di 3-5 di desèmber.

E atleta di Vela Van den Berg huntu ku su coach Jenkins lo sali dia 7 di desèmber for di Argentina, kaminda e atleta pa lunanan a hiba un preparashon, pa Montevideo. E kompetensia di Vela lo tuma lugá di 9-13 di desèmber na Punta del Este, Maldonado. 

NAOC su representante ta sr. Elvin Henriquez, ku a remplasá sr. Miro Seferina ku últimamente a haña su mes stroba. 

Na nòmber di NAOC nos ke deseá  e atletanan tur klase di éksito.