Otro biaha ta trata di un hoben Rappero Antiano kende ta habitante di Amsterdam Zuid Oost (Bijlmer).

E kaso aki a bin tuma lugar den madruga di djadumingu pa djaluna mainta ora ku den un vivienda situa den A.G. Smithstraat den bario Hoogezand na Groningen, e Rapper en kuestion a keda gravemente herida pa via di un disparo di arma di kandela.

Si amigunan di Bijlmer, kendenan e tabata hunto kune, a hinke den outo y kore mas ku 200 kilometer te Amsterdam y a bahe na Hospital Academico AMC den Bijlmer pa despues nan baha na katuna.

Informashonnan kual e personal di servisio di emergensia a duna kombina ku filmashon tanto paden komo pafor di e hospital, a bin pone ku no a dura mucho ku a bin haya sa ta ken ta esnan ku a baha e viktima na AMC.

Tres amigu di dje ku lo tabata hunto kune e madruga y a kore for di Groningen dos ora largo pa drop’e na hospital, lo mester sa mas tanto di loke a konduci na e kaso tristo aki.

Pesey tur tres a keda deteni.

E prome detenshonnan a kai y den ultimo tres dianan ku ta tras di lomba y e ultimo, esta e di kuater, a kai ayera tardi na Amsterdam.

E sospechoso di e tiroteo aki, kende ta un homber Antiano di 26 aña di edad, tambe a keda deteni.

E ta esun ku ta biba na Hoogezand, na Groningen y a los e disparonan fatal den madruga di djaluna.

Den prome deklarashon ku el’a duna, el’a bisa outoridadnan ku e tres otronan ku ta deteni hunto ku e viktima lo a bin serka dje na su kas na Hoogezand pa bin kumpra un kadena.

Ora ku nan kier a horta esaki bay kune, lo mester a surgi un situashon tenso y sla a bin kai y ta debi na esaki, el’a hasi uso di e arma di kandela pa defende su mes.

Segun prome Informashon polisial, e tambe ta un konosi di outoridadnan na Ulanda.

E viktima di e tiroteo aki a keda identifika komo e Rapper “Rel” Ferral Provence, nase dia 5 di Yuni 1983 na Ulanda, pues tambe tin 26 aña di edad y kende ta biba den Amsterdam Zuid Oost (Bijlmer) den bario Holendrecht, ku ta keda na e otro banda di metro, na altura di e mesun hospital unda el’a bin fayese.

Den Bijlmer y riba varios website a ser bisa ku e viktima ta un hoben Surnameo, na ultimo ora nos a bin kompronde ku mayornan di dje ta Antiano y el’a nase na Ulanda.

Ultimo tempo ta varios di e asina yama rappernan aki, kende ta biba den Bijlmer, sea a perde nan bida debi na tiroteo of otro kaso di violencia of a keda herida.

Nos tin ku duna Bernard Welten, hefe di polis na Amsterdam tog rason.