24ora.an - E Prome den Notisia - Poentje Castro den un otro oportunidat lo envolví polis promé

Poentje Castro den un otro oportunidat lo envolví polis promé

Tuesday, 10 November 2009 - 14:03

E konosido presentadó di e programa “Un dia den Bida” na Televishon, esta Johnny “Poentje” Castro a tene un konferensiá di Prensa awe mainta pa por aklará e motibu di su detenshon di siman pasa. Manera ta konosí, Polisnan a detené Poentje Castro bou sospecho di heling , pues di deskubrimentu . E la bisa awe ku e ta komprondé e trabou di Polis pero na ningun momento e no a hòrta nada y ni a kumpra nada hòrta. E la simplemente yuda e kantante Claudius Phillips pa rekobrá su laptop hòrta den su kas. Poentje Castro ta para riba ku den henter e asuntu aki, Claudius Phillips tabata bon na altura di tur loke tabata pasando y a yam’é desena di biaha den e dianan promé, pa sigurá ku Poentje Castro ta riba e bon kaminda pa rekobrá su pertinensianan. Poentje Castro, via di un persona ku a bin den kontakto ku ne promé via e-mail despues selular, a logra yega na e laptop hòrta y djaweps anochi e persona aki a entreg’é e laptop den su outo. Click read more pa mas detaye.

Poentje Castro a atmití awe ku ela hasi un fout kardinal di no a envolví polis den e asuntu òf di no a entrega e laptop djabièrnè mainta mesora despues di a haye den su poder. “Nos ta humano, mi a faya. Mi ta atmití ku kisas mi mester a dun’é mesora’, asina Castro a duna di konosé awe. Ela splika ku sera ela haya hopi chèns pa pensa di kiko e por a hasi mihó y kiko e no mester a hasi. Pero e ta lamentá ku sera den sèl e no por a demonstrá su inosensia, ta despues ku ela Sali ela logra haya printout di Setar ta demonstrá su korespondensia ku Claudius Phillips tantu via SMS y via yamadanan di selular, mustrando ku no ta nada skondí sino ta un fabor ela bai hasí un amigu. Lokual a sosodé ta ku un ratu despues ku e persona a entrega e laptop na Poentje Castro, Polisnan a pone man riba dje y a puntr’é pa e kòmpiuter pa kual e persona a bisa Polis ku ela duna Poentje Castro. Polisnan konsekuentemente a bai na kas di Poentje Castro y a detené.

Awor ta keda na Claudius Phillips mes pa sali afó y konfirmá ku e tabata sa di e operashon di Poentje Castro y asina evitá henter e pèrsekushon penal ku awor tin riba kabes di e presentadó di “Un dia den Bida”. Ela bisa ku si e haya e chèns pa hasi algu asina elo bolbe, hasié pero ku e biaha aki si elo informá Polisnan mesora pa e no haye mal sirbi asina. Pa loke ta e rumornan ku a sirkulá ku elo a kometé suisido den sèl, ela bisa di ta lamentá esaki masha pasobra su yunan y mama di su yunan a sufri masha pa esaki. E ta kere ku siudadanonan mester ta mas prudente ku e tipo di rumornan asina y Prensa tambe, debí ku un radio a manda un boletin èkstra bisando ku Poentje Castro a horka su kurpa.

Na final ela yama tur hende danki ku a sostené y ku tabata kuné den e momentonan difísil aki.